KUCHING, 26 Nov: Penembu Projek Lubok Tamang Agropark dikeandal ulih ngerichahka agi industri betanam betupi sereta ikas penatai pemisi rayat ba sitak Kunsil Nengeri (DUN) Saribas.
Sapit Menteri Pemansang Orang Indu, Anak Mit Enggau Komuniti (KPWKK) Sarawak, Datuk Mohd Razi Sitam madah diri berasai betuah laban projek nya udah dikemendarka Premier Sarawak Datuk Patinggi Abang Johari Tun Openg maya mantaika Bajet Sarawak 2024 empai lama.
“Terima kasih ngagai YAB Premier laban udah ngemendarka agih dikena ngaga Projek Agropark Lubok Tamang lebuh mantaika Bajet Nengeri Sarawak.
“Nitih penerang agih tambah ungkup Projek Lubok Tamang Agropark iya nya sepenyampau RM53.6 juta lalu ba taun 2024 diungkupka sepenyampau RM18 juta nyadi tu berita manah ngagai pelin ke diperambu ngelama tu ba DUN Saribas tauka Bagi Betong,” ku iya
Iya ke mega Kaban Kunsil Nengeri (ADUN) Saribas madah munyi nya lebuh dirandau pengari TVS nyerumba Aum Kunsil Nengeri (DUN) ditu lebuh Hari Empat.
Ku tandu Razi, penembu Projek Lubok Tamang Agropark nya ila mega nyadi pengenap ngagai Program Agro Pemakai di Sarawak.
“Projek tu iya nya siti projek diperambu kitai dikena ngerichahka agi sektor betanam betupi lalu nyadi penyungkak ekonomi rayat ba sitak Saribas dalam Bagi Betong mega nyadi ‘pengenap ngagai program agro pemakai ke udah diperambu ba serata Sarawak sebedau tu.
“Kitai meransang mensia mayuh sama ngambi bagi ari projek tu laban kitai mega bisi nyendiaka lot ungkup sebarang sapa ke bisi ati bejalaika pengawa betanam betupi ba Lubok Tamang Agropark nya,” ku iya.-TVS
