KOTA SAMARAHAN, 26 Nov: Perintah nengah Opis Menteri Pengawa Bekebun enggau Komoditi deka ngatur randau pasal chara ngatur chukai asil nyual kelapa sawit ungkup bala pekebun mit dikena ngurangka tating belanja ditapi raban nya.
Sapit Menteri Besai, Datuk Seri Fadillah Yusof madah, pekara ke dibantai nya bisi kaul enggau atur ngira chukai asil nyual ungkup minyak kelapa sawit ke udah diinjin.
Fadilah ke mega Menteri Pengawa Bekebun enggau Komoditi madah, sebagi ari randau nya ngaul perintah nengeri laban bisi chukai asil nyual ke udah diletak ejensi perintah nengeri.
“Nya alai, sida minta ngambika pekara nya diperunding, enti nitih chukai nya dikira ungkup minyak ke udah diinjin deka dieksport enggau dijual.
“Ukai ba buah, leka, tandan, ke disebut kitai buah tandan mata (BTS),” ku iya.
Nangkan ke nya, ngelansa pasal randau begulai enggau raban pekebun mit, ku Fadillah, antara isu ke dikerandau iya nya bekaul enggau hak chukai, bantu ari sukut kereban betanam betupi, ditambah enggau mayuh palan nimbang enggau bantu ari sukut sukung teknial sereta servis teknikal enggau sanding penemu.
“Ambika banding ditu, koko deka diidupka baru ba sitak tu, lalu udah dikelala sida ke begunaka mayuh begunaka sukung teknikal.
“Ditu mega kami bisi mai semua ejensi datai enggau mantu sida ari sukut servis teknikal enggau sukung nyengkaum ari sukut belanja enggau pom dikena minta.
“Arapka dikemendar, laban endang bisi tulung khas dikena ngidupka baru koko ba menua tu,” ku iya.-TVS
