KUCHING, 25 Nov: Perambu Perintah Sarawak ti deka nambahka elaun ninting bulan raban kaunselor ke nyadi kaban ba Opis Perintah Lokal (PBT) nerima timbal ke chukup manah beduduk ari pangku pengawa raban nya ke majak berat.
Siku kaunselor Opis Kaunsil Pelilih Saratok (MDS) Munjie Janggat madah, atur deka nikika elaun kaunselor nya ulih meri semangat ngagai sida ransing agi bejalaika pengawa.
“Aku setuju amat-amat nyukung penuh pasal pengawa deka nikika elaun kaunselor laban diatu kos kaunselor ke kulu kili, kereja enggau skop pengawa diatu besai enda baka ke dulu suba lalu ari iyaka ditiki nya bisi meri semangat ngagai kami ke nyadi kaunselor bejalaika pengawa,” ku iya.
Udah nya, Kaunselor Supol Geringu madahka iya endang setuju ke elaun kaunselor ditikika laban jauh enda mit dibanding enggau elaun diterima bala tuai raban bansa.
“Kami kaunselor tu enti dibanding enggau Tuai Raban Bansa bukai baka penghulu enggau tuai rumah jauh endar mit.
“Nyadi berasai endar ba kami utai nya (elaun) enda chukup kena meli minyak pan enda chukup nyadi aku setuju endar enti perintah deka niki ke nya ni ke patut ba sida iya aku nyukung penuh,” ku iya.
Udah nya, Kaunselor Pati Gimang ngarapka atur deka nikika elaun kaunselor mujur dipejalai sereta diputarka perintah enggau lengkas.
“Arapka elaun nya ulih diperambu lalu diaduka sida iya lalu disetuju sereta ulih diterima ti deka datai utai ke udah disebut tu lalu dikeamatka sida iya (Perintah).
“Nya alai, ari elaun ke niki ari 300 ke diatu ditambah nya bisi ke pengelempung ngagai semua kaunselor di Sarawak ditu,” ku iya.
Kepenudi Kaunselor Awat anak Uyak madahka atur nya tau bendar meri peransang ngagai raban kaunselor di menua tu ngambi bebendar agi bejalaika pengawa lebih agi mantu opis kaunsil pelilih ba menua diri empu.
“Enti amat munyi utai tu ditikika iya ulih meri peransang ngagai bala kaunselor ngambi ngemaju ke agi sitak diri empu laban beduduk ari nya utai ke diadu ulih nitihka juluk ati,” ku iya.
Sida bela mansutka timbal penemu nya maya dirandau pengari TVS ba Begunan Kunsil Nengeri (DUN) Sarawak pengudah tembu ngemataka Aum DUN nya lebuh Hari Empat.
Dulu ari nya bisi 25 iku kaunselor, tuai rumah enggau kaban parti PDP Pampang Krian ngatur penemuai sepengelama sehari ngagai Begunan Kunsil Nengeri (DUN) Sarawak seraya mendingka leka aum DUN ke benung dipejalaika.
Ungkup penemu, sebedau tu Sapit Menteri Pengerai Mensia Mayuh, Pengawa Berumah enggau Perintah Lokal Datuk Dr Penguang Manggil ba sebengkah pengerami di Kuching apin lama madahka Perintah Sarawak udah setuju deka niki ke penyampau elaun bala kaunselor ke nyadi kaban PBT di nengeri tu.-TVS
