PUTRAJAYA, 19 Nov: Opis Menteri Pengerai Malaysia (KKM) ngenukuka bisi nyadi sekeda kes Tuberkulosis tauka TB di Cheras, Kuala Lumpur tang pengerekai penyakit nya agi ulih tagang.
Menteri Pengerai Dr Zaliha Mustafa madah TB ukai siti epidemik lalu raban sida deka seruran matau pengerekai penyakit nya.
“Taja pia begian KA tauka Public Health benung beratika senentang isu tu lalu kami enggai mih reti nya pekara ke enda betul nya dikerembai laban kitai enggai mensia mayuh berasai kelalu takut,” ku iya.
Iya madah munyi nya pengudah Ngintu Minggu Pemereti Ati Kachau Antimikrod Sedunya Renggat Nasional 2023 enggau Bejadika Pelin Respon Kachau Antimikrob Malaysia (MyAP-AMR) 2022-2026 ditu, kemari.
Dr Zaliha meransang rayat mayuh patut lengkas nganjung diri berubat nyema bisi kelai baka batuk enggai badu-badu.
Antara kelai besai ke patut diberi perati iya nya tabin, bepeluh maya malam hari, nyawa enggai makai, berat tubuh nurun enggau batuk bedarah.
Tandu iya, penerang senentang kerekai penyakit nya ulih ditemu nengah aplikasyen MySejahtera laban KKM udah ngerikodka penyampau kes ba kandang endur ke semak enggau diri empu.
Iya madah penyampau pesakit TB deka dikeluarka Opis Pengerai Nengeri (JKN) enda lama agi enggau mensia mayuh enda ibuh irau laban penyakit nya ulih disekat nengah chara betuchuk vaksin.-TVS
