SARIKEI, 19 Nov: Kos pengidup ke majak niki sereta pemar ngulihka belanja ungkup pedagang mit di menua tu entara pekara ke dikearap diberi perati ari perintah dalam Bajet Sarawak 2024.
Siku Pedagang Krafjari Iban, Dina Igoh, 38, ari Sarikei madah, ba Bajet Sarawak 2024 iya ngarapka perintah ulih nendurka atur ke udah ditetapka ungkup raban pedagang mit.
“Kami ngarapka Bajet Sarawak 2024 bisi ngungkupka bantu dikena nulung bala kami ke bedagang mit.
“Baka ari sukut minta jali dikearapka ulih ditendurka agi atur ungkup raban pedagang mit,” ku iya.
Udah nya Mohd Mokhafiz Mohd Firdaus madah, ba Bajet Sarawak 2024 iya ngarapka mayuh agi bantu baka ngatur kus pengawa dagang ungkup raban sida ke nembiak.
“Patut bisi peransang enggau kemuntangka raban nembiak ti deka nyereta kus dagang lebih agi sida ke udah lepas SPM laban enda semua ari sida nya bulih pemutus peresa ke manah ba akademik,” ku pinta iya.
Kepenudi Mat Bahara, 43, ari Lubok Antu ngarapka perintah neruska atur meri subsidi ba bil utiliti dikena ngelempungka tating belanja ke ditapi rayat rayat ninting hari.
“Kitai bela ngasai diatu ringgit nyau majak nadai rega. Tambah mega rega barang nyau majak niki nyadi kira kitai minta tulung ari perintah mih meri bantu ke patut baka subsidi bil karan, ai endang patut diteruska baka selama mih,” ku iya.
Sida mansutka penemu nya maya dirandau pengari TVS ba taba Pesta Nanas ditu, kemari.
Ke penerang, Bajet Sarawak 2024 dipelaba deka dibantaika Premier Sarawak Datuk Patinggi Tan Sri Abang Johari Tun Openg ba hari keterubah Aum Kunsil Nengeri Sarawak ke diatur berengkah Hari Satu tu.
Ungkup penemu ba taun 2023 Perintah Sarawak bisi ngungkupka belanja sepenyampau RM10.797 bilion dikena ngemujurka pemansang di nengeri tu.-TVS
