SARATOK, 16 Nov: Kaban Kunsil Nengeri (ADUN) Kalaka Mohd Duri madah, agih belanja sepenyampau RM2 juta Baruh Ejensi Pemansang Bagi Betong (BDDA) udah dikemendarka ungkup projek ngaga baru enggau nyeruri pintu ai ba Kampung Perpat.
Ku iya, penembu projek tu ila deka mutarka penanggul ampuh bah ke suah nyadi ba Kampung Perpat lalu semua lapan iti projek nya deka ditinda sebedau apus taun tu.
“Penanggul besai (suah) ditapi perayat ba Kampung Perpat iya nya dituntung bah tunggal.
“Nya alai enggau nya kitai udah bulih agih belanja nengah BDDA beungkus RM2 juta dikena ngemanah lalu ngemesaika dua iti pintu ai ke suah ngasuh bah nyadi.
“Udah nya, kitai deka ngaga enam iti pintu ai baru dikena ngelepaska ai ari kebun tauka siti-siti alai ai ngandang ba genturung pendiau tu ngagai Sungai Krian.
“Sida DID udah bisi ngabas lalu berandau enggau orang ba menua nya lalu projek tu dijangka deka ditinda (sebedau apus) taun 2023 ,” ku iya
Iya madah munyi nya ngagai media pengudah bejadika program pemereti ati senentang pengelikun maya angus ba Sekula Primari (SK) Perpat, pagi tadi.
Ku tandu Mohd Duri, agih belanja baruh projek transformasyen menua pesisir (RTP) 2024 sepenyampau RM650, 000 mega udah dikemendarka dikena ngaga diwan ba SK Perpat, masang atap ba Diwan Tebuka Kampung Tengah Perpat enggau ngaga baru librari JKKK Kampung Hulu Perpat.
“Puji Tuhan ba RTP taun 2024 baka ke udah diputuska ba Lab digaga di Kuching kena 13 ngagai 14 tu tadi dia Diwan Sri Pinang ba SK Perpat beungkus RM400, 000 deka digaga.
“Udah nya, deka digaga mega pengawa masang atap ba Diwan Tebuka Kampung Tengah Perpat beungkus RM150, 000 enggau librari ba JKKK Kampung Hulu Perpat beungkus RM120, 000,” ku iya.-TVS
