KUCHING, 14 Nov: Pengawa ngasilka produk krafjari dipeda ulih nyadi penyungkak besai ba penatai pemisi ruang bilik sekalika ari buluh, bemban, senggang, wi enggai ke bukai.
Ku Anthony Jawi, 52 taun ari Rumah Mujah, Bintulu madah, iya endang ngembuan pengerindu ti dalam ba pengawa beranyam wi taja pengawa tu kebendar mayuh dikereja orang indu.
Berindik ari nya , iya mupuk belajar beranyamka bakul, raga enggau tupi ari wi ti dipeda ulih nyadi pengerandang ekonomi ruang bilik nengah pengawa bejualka produk krafjari.
“Aku nguji ke jari diri empu laban jari kitai laki tu ti kasar agi asai ya enda baka jari orang indu,”ku iya madah.
Iya mansutka jaku nya rambau dirandau pemberita TVS maya program Expo Non-Timber Forest Products (NTFP) 2023 di Plaza Merdeka, tadi.
Ngelansa pasal produk asil kampung tu, iya madah, pengawa ngulihka wi ukai pekara ke mudah dikereja laban napi mayuh pemar nujah serata kampung.
“Enda semesti iya nuan tama ngagai ke kampung tu lalu bisi kayu wi.
“Laban kekadang bisi kampung ke nadai ngembuan kayu wi, tang kayu wi tu sigi ulih digiga,” ku tandu iya.
Apai ngagai empat iku anak nya madah diri berasai lantang bekau ari mujur ba pengawa dagang krafjari ti udah ngangkatka tikas pengidup sida sebilik ari untung bejualka produk krafjari.
Ku iya, produk krafjari ti asilka iya bekualiti sereta mayuh nerima peminta berindik ari pengalus enggau pemanah asil produk ke digaga iya.
“Enda ga ngumbai iya rugi, enda ga ngumbai iya untung tang bisi ga asil penatai pemisi mimit.
“Nadai ga kami ngira enti kami untung ke enda, laban pengawa tu sigi ke utai ti dikerindu ke kitai,” ku iya nerang nyemetak.
Nangkanka nya, kraf jari ulih digaga ari mayuh macham utai baka leka marik, ubung, rutan, kulit kayu tekalung, kulit jelu, kayu enggau mayuh agi ke bukai.
“Sekeda kraf jari dijual kami iya nya baka bakul, raga, tikai, chapan sereta produk ke bukai.
“Chunto iya, tray tu iya nitih pemesai, ke mit berega RM30 lalu ke besai berega RM80. Kelimpah ari nya, topi ke dijual kami tu berega RM100,” ku iya baru. – TVS
