ROBAN, 13 Nov: Tim Lumba Perau Komiti Pengelikun enggau Pemansang Genturung Pendiau (JKKK) Kampung Melayu Roban mujur ngempu gelar Raja Sungai Seblak Pesta Roban 2023.
Menijar Tim Lumba Perau JKKK Kampung Melayu Roban Ali Nusi, 63 madah pemujur teulihka gelar Raja Sungai Seblak Ba Pesta Roban 2023 chukup besai reti lebih agi sida ke udah sebulan nyikap diri ungkup pekit nya
“Chukup gaga ati laban tu terubah iya tim kami menang kenyau Pesta Roban tu diatur.
“Mayuh penguji sekumbang kami besemekih enggau tim bukai.
“Mimit da kami nyau asai deka nyerah alah tang nasip berekat ari latih sepengelama sebulan semua nya ulih ditapi sereta mai pemujur,” ku iya.
Iya madah munyi nya lebuh dirandau TVS pengudah pemutus Lumba Perau Pesta Roban 2023 dibantaika ba Pangau Besai Pesta Roban 2023 ditu kemari.
Nangkan ke nya, Ali ngarapka Pesta Roban terus diatur ungkup taun ke deka datai.
“Mensia mayuh tentu mega rindu laban kenyau ari taun 2001 kepenudi Pesta Roban diatur lalu taun tu mujur diatur baru.
“Nya alai, aku ngarapka ba taun bukai Pesta Roban ulih diatur enggau rami agi (dudi hari),” ku iya.
Bekau ari pemujur nya, Tim Lumba Perau JKKK Kampung Melayu Roban mujur mai pulai perais mata duit sepenyampau RM3, 000 enggau trofi.
Udah nya, penuduk lumur dua dipenggi Tim Lumba Perau JKKK Rumah Punggah ti mai pulai perais mata duit RM2, 000 sereta Tim Lumba Perau JKKK Kampung Pagan ba penuduk lumur tiga nerima perais mata duit RM1, 500 mega disempulang enggau trofi.-TVS
