ROBAN, 13 Nov: Kaban Kunsil Nengeri (ADUN) Krian Friday Belik madah pemayuh bala temuai ke bisi ngulu Pesta Roban 2023 manggai 20,000 siti kelai ke chukup manah enggau pemujur besai ngagai raban komiti pengatur pengerami nya.
“Nitih penerang ari Tuan SAO tadi berengkah ari 3 November iya nya dalam timpuh 10 hari penyampau mensia ke bisi datai manggai 20, 000 iku ke Roban.
“Nya alai tu siti japai (rikod) ke chukup manah,” ku iya maya nutup Pesta Roban ditu, kemari.
Sama bisi datai ngulu pengerami nya ADUN Kalaka Mohd Duri, Chairman Pesta Roban 2023 Steve Miller Nuas, bala tuai raban bansa enggau ke bukai.
Udah nya, ku Friday iya andal Pesta Roban 2023 udah mujur nyadi siti pelasar ke chukup nemban endur mantu nyungkak penatai pemisi raban pedagang mit lebih agi ba pelilih Roban.
“Pesta Roban udah meri bekau ke nemban, ukai semina ngagai kitai orang Roban aja tang mensia mayuh besemak baka ari Kabong, Debak sereta Sarikei.
“Tu mega nunjukka Pesta Roban tu diperati mujur endur nambahka penatai pemisi raban orang dagang,” ku iya.-TVS
