DEBAK, 8 Nov: Teperasa meda iklan kereja ke manah enggau diberi gaji ke besai baka dibayar ngena USD (Dollar Amerika) antara kebuah ngujungka rayat menua tu bisi kena tipu gawa di menua luar.
Kepala Polis Sarawak Dato Mohd Azman Ahmad Sapri madah kelimpah ari nya, pengagit deka raun ke menua luar enggau kurang pemereti ati senentang kes scammer mega antara kebuah penyadi kes nya.
“Kebuah penyadi lebuh meda iklan kerja ke manah ti nyendiaka gaji besai baka dibayar USD, udah ungkus ngaga pasport ditanggung, tikit bilun enggau hotel sereta ngatur pejalai Sarawak ke Kuala Lumpur enggau terus ngagai endur gawa di Myanmar.
“Udah nya, pengagit deka raun ke menua luar enggau kurang pemereti ati senentang kes Scammer ke kala nyadi,” ku iya.
Azman madah munyi nya maya nerang ngagai raban media senentang kes rayat ari menua tu ke suah kena tipu gawa di menua luar nyerumba pengawa bejadika Balai Polis Debak ke baru, kemari.
Nangkan ke nya, Azman terus ngelalau mensia mayuh anang enda bejimat lebuh muka sebarang laman web tauka laman media rama tu ngaul pengawa puang ke bisi disediaka ba menua luar.
“Aku ngelalau mensia mayuh anang enda bejimat lebuh muka laman web bekaul enggau pengawa puang gawa ba menua luar ti nyendiaka mayuh penyamai enggau gaji besai.
“Peresa silik tauka berunding manah enggau diri sebilik tauka orang ke lebih landik ngambika enda kena tipu,” ku tandu iya.
Ungkup rikod, ku Azman kena bulan September tu tadi raban polis Sarawak bisi nerima tiga iti ripot senentang kes kena tipu gawa di menua luar, naka tu kes nya mujur diputarka nengah saup raban polis ari Indu Opis Polis Bukit Aman.-TVS
