BETONG, 7 Nov: Polis Diraja Malaysia (PDRM) Sarawak deka nganjung siti ripot khas ngagai Bukit Aman enda lama agi.
Kepala Polis Sarawak Dato Mohd Azman Ahmad Sapri madah, ripot khas nya senentang pemar logistik dalam neritka atur undang-undang enggau pengelantang mensia mayuh di Sarawak mungkur 10 opis besai, 28 indu opis polis pelilih enggau 85 buah balai sereta 14 buah langkau polis di nengeri tu.
“PDRM Sarawak empu deka nyendiaka siti ripot khas senentang pemar engga kuing tuju ari sukut logistik neritka undang-undang enggau pengelantang mensia mayuh ba Sarawak.
“Tu ngaul 10 opis besai, 28 indu opis polis pelilih enggau 85 buah balai serera 14 buah langkau polis ke kala diabas aku,” ku iya.
Azman mansutka pekara nya rambau aum media pengudah bejadika Balai Polis Debak ditu, kemari.
Ku tandu Azman, ripot nya deka nyadi malin timpuh pandak enggau panjai di Bukit Aman udah tu lalu pekara nya udah dipadah ngagai Premier Sarawak Tan Sri Datuk Patinggi Abang Johari Tun Openg empai lama.
“Ripot ke digaga aku nya deka dianjung aku ngagai Kepala Polis Menua ngambika ulih nyadi malin timpuh pandak enggau panjai.
“Pekara nya mega udah dipadah aku ngagai Premier Sarawak maya atur betemu enggau iya 2 haribulan maya hari aku dipadahka betukar gawa ke Bukit Aman kena 10 November tu ila,” ku iya.
Ngelansa pengawa sehari nya, Balai Polis Debak berengkah digaga taun 2016 enggau tembu 2018.
Pemesai Balai Polis Debak tu urung 2.16 hektar sereta digaga enggau ungkus sepenyampau RM17,344,943.00 disikap perengkaguna sebuah blok pengereja pengawa, begunan stor barang kes, sebuah kuaters staf kategori E enggau 16 unit rumah kategori F disikap enggau sebuah gelanggang futsal.-TVS
