BETONG, 7 Nov: Sapit Menteri Pemansang Orang Indu, Nembiak enggau Pengelantang Komuniti Sarawak ke mega Kaban Kunsil Nengeri (ADUN) Saribas, Datuk Mohd Razi Sitam madah diri deka mantu mayar ungkus nyambung meter bekal karan enggau ai ungkup raban polis ke deka diau ba Kuarters Balai Polis Debak.
Ku iya madah tu siti inisiatif dikena ngerichahka agi endur nya ngambika bisi orang ngani kuarters nya.
“Balai Polis Debak tu bisi disediaka siti kuarters ti ngaul 16 unit nyadi staf polis semina bisi lapan iku.
“Nya alai, aku meransang raban polis ke deka diau ba dia ari pelilih bukai ulih diau dia..mayar api ai dikena mantu sida,”ku iya.
Iya bejaku munyi nya lebuh dirandau raban media sepengudah ngulu pengawa bejadika Balai Polis Debak ke baru ti dipejadika Kepala Polis Sarawak, Dato Mohd Azman Ahmad Sapri di Debak, kemari.
Nangkan ke nya, Razi madah juluk diri deka meda nyadika kuarters nya nyadi palan alai ngetu ungkup pegawai, raban enggau staf polis ari pelilih bukai ke ngembuan pengawa rasmi.
“Naka ke diatu aku sepunsa siti transit enggau nyendiaka siti unit flat nya dijadika palan alai ngetu ungkup pegawai polis enti sida bisi pengawa rasmi baka konsep ‘rest house’ di Opis Residen ba Balai Debak ke kusung nya.
“Nyadi unit transit tu deka disikap enggau kereban dalam rumah, tilam, katil, irkon enggau ke bukai,”ku iya.-TVS
