BINTULU, 5 Nov: Kaban Kunsil Nengeri (ADUN) Jepak ke baru, Iskandar Turkee ngasaika strategi GPS betemu pengundi lebih semak dibanding enggau licha atas panggau diperati siti stategi ke pemadu ngasi.
Tu laban iya enda nyangka bulih majoriti besar iya nya 8,748 undi dibanding Pengawa Bepilih Besai Nengeri (PRN) Sarawak ke-12 iya nya bisi 4,243 diulih penyandang niang Datuk Talib Zulpilip.
“Strategi nya chukup ngasi. Nama kebuah? Kitai lebih ngagai ‘focus group’ ngambika kitai ulih betemu enggau sida lalu sida ngasaika penatai kitai, ngelawa sida.
“Tu amat strategi ke chukup ngasai laban rayat deka kitai ngelawa sida ukai sida ngelawa kitai baka enti bebala mayuh nya tentu nyamai.
“Nyadi, lebih nyaran ngagai nempa kaul, betemu pengundi endang siti chara ke pemadu manah,”ku iya maya dirandau media pengudah tembu pengawa mantaika pemutus PRK Jepak diatur ba Diwan Suarah Bintulu ditu, malam tadi.
Beduduk ari nya, iya meri besai terima kasih ngagai sukung ke udah dipandang ngagai parti-parti komponen gps iya nya Parti Pesaka Bumiputera Bersatu (PBB), Parti Sa’ati Rayat Sarawak (SUPP), Parti Rakyat Sarawak (PRS) enggau Parti Demokratik Progresif (PDP) ke udah bebendar ngetanka penuduk asal DUN Jepak.
Pia mega, maya ditanya pasal perambu silik iya, ku Iskandar semua perambu nya deka diperati dikena nentuka kuing tuju Jepak nuju pemansang terus meruan.
Tu dikena nentuka semua perambu digaga ex-adun Jepak, niang Datuk Talib Zulpilip ulih diteruska.
“Sepengudah aku angkat sumpah ila aku deka nurun ke Opis Servis aku laban deka beratika baru kuing tuju pengawa ke udah dirandang niang Datuk Talih Zulphilip lalu berebak enggau nya aku deka neruska perambu nya enggau nyema bisi perambu ari Perintah nyadi kitai deka ngereja nya seriris enggau pematut ba DUN Jepak,” ku terang iya.
Iskandar Turkee mujur ngalahka chalun ari Parti Bumi Kenyalang (PBK) enggau parti Aspirasi Rakyat Sarawak nengah penyampau majoriti 8,784 iti undi.-TVS
