KUCHING, 5 Nov: Sapit Premier Sarawak, Datuk Amar Douglas Uggah Embas ngasaika pemujur GPS di DUN Jepak nyadi kelai rayat chukup arap ngagai iring Premier Sarawak, Datuk Patinggi Tan Sri Abang Johari Tun Openg.
Ku iya, sitak Jepak endang sitak ke maju lalu rayat meda semina GPS aja ulih mai pemansang ngagai sitak nya.
“Amai aku bisi enggau dalam kimpin lalu aku meda timbal rayat chukup manah.
“Aku ngasai (pemujur) nya mega mandangka pengarap rayat ngagai polisi iya, ngagai program pemansang ke udah dipejalaika kitai sereta kuing tuju iya dalam mai Sarawak lebih agi nengah Strategi Pemansang Udah COVID-19 (PCDS) 2030,” ku iya.
Iya ke mega Sapit Presiden PBB madah munyi nya maya dirandau media pengudah Pengerami Makai Lemai Gala Serakup Besai Gerempung Veterinar Asia (Fava) Ke-22 enggau Kongres Gerempung Perubat Veterinar Malaysia (Mavma) Ke-33 Ungkup Taun 2023, di Kuching, malam tadi.
Lebuh nerang silik, iya mega meri terima kasih nuju semua pengundi laban nengah sukung sida ngujungka GPS terus diberi tanggungpengawa ngatur pemansang ba sitak DUN Jepak.
“Aku andal pengari rayat ke baru, orang baru, orang ke ngembuan pelajar, aku udah meda iya sebedau tu, nyadi aku andal iya ulih ngamatka peminta rayat,” ku terang iya.-TVS
