PAKAN, 5 Nov: Pengawa bepilih dalam parti ke diatur ukai reti bebida penemu, tang nya siti ari atur ke udah ditetap bepelasarka kunstitusyen parti.
Sekretari Besai PDP, Dato Anyi Ngau madah, nya alai bekau ari pemutus ke udah ditemu dia bala kaban Parti Progresif Demokratik (PDP) diperansang terus bekerejasama enggau raban ketuai ke udah dipilih sida.
“Baka dipadah aku tadi PDP tu siti parti ti angkun ngagai semua kaban parti ukai semina ba Pakan aja tang ba semua pampang PDP.
“Nya alai kitai ngarap ke semua kaban parti terus ulih bekerejasama enggau manah entara pangan diri taja sepengudah pengawa milih tuai pampang tembu.
“Taja kitai bisi pengawa bepilih dalam parti tang nya ukai reti kitai bebida penemu tang pengawa bepilih tu endang siti atur ke udah ditetapka dalam parti ngambi ke semua kaban parti tepantup ati,” ku iya.
Anyi ke mega Kaban Parlimen Baram madah munyi nya pengudah tembu Aum Ngenyit Parti Progresif Demokratik (PDP) Pampang Pakan endur milih tuai pampang, tuai indu enggau pemuda parti nya ba Diwan Mensia Mayuh Pakan, kemari.
Ba pengawa nya Fung Kok Shiun mujur dipilih nyadi Tuai PDP Pampang Pakan ke baru pengudah ngalahka Ting Kiew Ming enggau penyampau 156 undi.-TVS
