PAKAN, 4 Nov: Suki Anak Sabot, 52, dipilih nyadi Tuai Indu Parti Progresif Demokratik (PDP) Pampang N. 47 Pakan ke baru berengkah sehari tu.
Lebuh dirandau TVS, Suki meri besai terima kasih ngagai kaban Indu PDP Pampang Pakan laban udah nyukung lalu arapka iya ngiring raban indu ungkup pampang nya.
“Aku berasai gaga laban udah ulih ngamatka niat bala penyukung aku ti deka ke aku menang serak tu.
“Nya alai terima kasih nuju semua nyengkaum sida ke enda ngundi aku tadi, aku tetap beterima kasih ngagai sida laban udah sangup datai ari jauh.
“Pemujur tu chukup besai reti ba aku. Nya alai sekali agi terima kasih nuju semua,” ku iya.
Iya madah munyi nya pengudah tembu pengawa bepilih milih Tuai Indu Progresif Demokratik (PDP) Pampang Pakan ke diatur beserimbai enggau Aum Besai Ngenyit PDP Pampang Pakan ba Diwan Mensia Mayuh Pakan, pagi tadi.
Beduduk ari nya, Suki ngembuan juluk terus ngemansang Gerempung Indu PDP ba N. 47 Pakan ngambi besai agi ari diatu.
“Laban ke baru apin ulih terunding ke utai mayuh semina diatu aku berunding deka ngedut kerejasama enggau raban indu lebih agi di Pakan ditu.
“Aku deka ngaga siti raban gerempung ke besai agi udah tu ungkup Pakan,” ku iya.
Ba pengawa bepilih Tuai Indu Pampang PDP Pakan nya Suki mujur teulih ke 64 iti undi ngalah ke penyandang sebedau tu iya nya Pamela Gelingie Aprit ke semina teulih ke 43 iti undi.-TVS
