SARATOK, 4 Nov: Perambu perintah penyerakup ti deka ngidupka baru Program Latih Ke Menua Enggau Bansa (PLKN) 3.0 nerima timbal positif ari raban nembiak di menua tu.
Siku nembiak Olivia Lampai Malaka ari Saratok madah perambu perintah ngidupka baru PLKN tu endang manah dikena nerenak semangat angkun ke menua.
“Ba penemu aku perambu perintah deka numbuh ke PLKN manah laban nya ulih dikena ngangkat ke semangat sayau ke menua diri lebih agi ba raban nembiak ke serebak enggau aku mih.
“Arapka raban nembiak ulih meri kerejasama mih ngagai sapa ke dikangau nyereta PLKN ila,” ku iya maya dirandau TVS ba sebengkah program ke diatur ditu, kemari.
Udah nya, Timoty Japang Nambu mega sepenemu enggau Olivia, madahka Program PLKN nya beguna bendar ngagai raban nembiak ngambika terus ransing nyaup ngemansang ke menua jemah.
“Ba aku tu chukup manah ungkup nembiak kemaya hari diatu laban sebagi ari chara dikena kitai nerenak semangat patriotisme pengelikun menua kitai.
“Pia mega nengah program tu ulih meri peransang ngagai nembiak ngambi angkun ke menua kitai Malaysia,” ku iya.
Pia mega ba penemu Hanisah Jaafar ngarap ke atur ditetapka ngagai genap pesereta PLKN ulih dialuska agi lebih agi ungkup sida ke udah bisi ruang bilik.
“Ba penemu aku PLKN tu endang sigi manah semina enti ulih atur iya ditendur ngagai sida ke udah bisi ruang bilik nya ulih dikelaung nyereta PLKN,” ku iya.
Ungkup penemu, sebedau tu Mindef nengah siti penerang madah ke program PLKN 3.0 nyema iya dipejalaika baru 2024 semina deka ngangauka bujang dara ke ada taun 2007 aja.-TVS
