BETONG, 2 Nov: Bisi 10 iti projek betanam betupi baruh Komiti Kereja Sektor Betanam Betupi enggau Industri Pemakai Ejensi Pemansang Menua Betong (BDDA) ba sitak Kunsil Nengeri (DUN) Krian diatu udah ditinda.
Kaban Kunsil Nengeri (ADUN) Krian Friday Belik madahka semua projek betanam betupi nya beungkus RM6.5 juta sereta diperambu dipejalaika taun baru.
“Nyadi aum tu tadi udah bejuraika rintai projek ke dibaruh komiti (BDDA) tu.
“Kitai di Krian udah ditender bisi 10 iti enggau ungkus RM6.5 juta.
“Projek Jalai Kebun tauka projek betanam betupi dibaruh komiti kereja betanam betupi enggau agro pemakai bela dibaruh BDDA,” ku iya.
Iya ke mega Chairman Komiti Pengereja Pengawa Sektor Betanam Betupi enggau Industri Pemakai Ejensi Pemansang Menua Betong (BDDA) madah munyi nya sepengudah tembu aum sektor nya ba Bilik Aum Pemansang Opis Residen di Betong, empai lama.
Nambah nya ku iya, ba renggat kedua ila ungkup sitak Krian mega bisi 10 iti agi projek baruh komiti kereja sektor betanam betupi enggau industri pemakai deka digaga enggau ungkus sepenyampau RM10 juta ringgit.
“Ba fasa kedua tu kitai Dun Krian bisi ngungkupka RM10 juta.
“Nya alai diatu benung ngaduka senarai projek ke beungkus RM10 juta nya.
“Nya alai ngarapka ulih ditender dalam bulan November tauka bulan Disember tu ila awak ke bisi dikereja ba taun ke baru (2024),” ku iya.
Ungkup penemu, ba renggat keterubah tu dipegulai sekali bisi 12 iti projek baruh Komiti Sektor Betanam Betupi enggau Industri Pemakai Ejensi Pemansang Menua Betong (BDDA) ba bagi menua Betong enggau ungkus sepenyampau RM42 juta.
Sama bisi ngulu aum iya nya Residen Betong, Richard Michael Abu Nawas, bala pengari Kaban Kunsil Nengeri (ADUN) enggau Kaban Parlimen ba Betong enggau ke bukai.-TVS
