SARATOK, 31 Okt: Kaban Kaunsil Nengeri (ADUN) Krian Friday Belik andal chalun Gabungan Parti Sarawak (GPS), Iskandar Turkee ulih menang ba Pengawa Bepilih Mit (PRK) sitak Kunsil Nengeri (DUN) Jepak kena 4 November tu.
Ku iya, tu berindik ari sukung ti dibantaika bala tuai-tuai dalam parti GPS sereta pengawa kimpin lanchar dipelajaika di sitak nya.
“Aku beratika bala kitai dedin (Jepak) lebih agi ba ‘Bilik Gerakan’ GPS udah chukup manah.
“Udah abis atur lalu belabuh ari maya ngantung nama sampai diatu bala tuai GPS endang udah betatam di Jepak din nulung chalun GPS kimpin,” ku iya.
Friday madah munyi nya lebuh dirandau TVS pengudah tembu Program Begulai enggau Rayat ba Rumah Tugau Jalin ba Brayang Kemuntang Seblak Roban, kemari.
Ba awak ke sama, Friday mega meransang bala pengundi lebih agi raban pengundi biak sampal nurun ngundi lalu meri sukung ngagai chalun GPS, Iskandar Turkee dikena ngeringka menua Sarawak ungkup pemansang ti meruan.
“Kitai ngarapka semua pengundi lebih agi bala ‘Pemuda’ tauka pengundi biak beumur 18 taun ke atas datai sama ngundi lalu meri sukung ngagai chalun GPS.
“Kebuah pia laban naka tu kitai di Sarawak ditu kitai sama bela nemu semina GPS siti parti ke ulih ngempung lalu ngeringka kitai menua Sarawak empu dalam konsep ‘Sarawak First’ tauka ‘Utamakan Sarawak’,” ku iya.
Sama bisi datai nyempulang pejalai Friday iya nya, Penulung Pegawai Opis Pelilih Mit Roban Steve Miller enggau ke bukai.-TVS
