KUCHING,30 Okt: Penumbuh Kaunsil Nyaga Turu Pesaka Bansa Sarawak (SSWF) ungkup ngatur Turu Pesaka Bansa Sarawak enggau lebih profesional deka mantu negapka ekonomi Sarawak, ku Premier Sarawak, Datuk Patinggi Tan Sri Abang Johari Tun Openg.
Iya mega madah pengawa ngatur turu dipejalaika kaban kaunsil ti tebangkar ngujungka Sarawak ngembuan penatai pemisi ke lebih lalu ulih beranakka puku kelimpah ditaruh dalam institusyen wang ke udah tegap.
“Nyadi reti nya pekara ke digaga kitai diatu iya nya ekonomi Sarawak deka nyadi tegap.
“Kitai deka bisi penatai pemisi ke lebih lalu kitai meranakka puku enggau naruh iya dalam institusyen wang ke tegap, turu ke tegap ungkup pengidup anak Sarawak jemah.
“Nya alai, aku ngasai jemah ekonomi Sarawak deka nyadi lebih tegap,” ku iya.
Iya madah munyi nya maya dirandau media pengudah nerima penemuai basa ari Kaban Kaunsil Penyaga Turu Pesaka Bansa Sarawak ba Palan Konvensyen Borneo Kuching (BCCL), kemari.
Nerang silik, Abang Johari madah agih belanja tumu turu nya sepenyampau RM8 bilion lalu nya enda dikachau dalam timpuh 20 taun ngambika terus beranak.
“Kitai udah meri ‘seal capital RM8 billion’ lalu nya sigi enda dikachau dalam timpuh 20 taun kelimpah kitai napi krisis baka perang enggau krisis ti begunaka turu.
“Tang enti ulih baka selama kitai sigi enda negu turu, ungkup 20 taun.
“Reti nya belanja tu deka diperanak baka ke dipeda kitai turu Norway enggau chara tu diperanak aku nyerah ngagai tebangkar ke bisi dalam kaunsil,” ku terang iya.
Tandu iya, Turu Pesaka Bansa nya bepelasarka prinsip Santiago lalu Sarawak deka nyadi kaban ngagai ‘London Sovereign Fund Forum’ iya nya sebengkah institusyen antarabansa ke matau turu-turu pesaka bansa.-TVS
