KUCHING, 29 Okt: Sarawak deka mantu perintah besai nempa raban pengajar tebangkar narak bala anak kategori Raban Nyelai Pendau (OKU) nengah Universiti Teknologi Swinburne.
Premier Sarawak Datuk Patinggi Tan Sri Abang Johari Tun Openg madah, agih belanja nya deka diberi ngagai universiti nya dikena nyendiaka latih ke bekaul.
Ku Abang Johari, raban sida udah ngagihka belanja khas ngagai Universiti Swinburne dikena narak pengajar enggau chukup penemu.
Pia mega, universiti nya endang bisi nyendiaka kus nya ba Melbourne, Australia.
“Laban ba Australia sida endang bisi kus ari sukut narak pengajar nyadi pengajar kitai deka dilatih ba kampus Sarawak.
“Enti sida (pelatih pengajar) nya deka nambahka pengelandik ba tikas Master Degree nyadi saran baka orang autisme kitai deka nganjung pengajar tu belajar ba Australia ba Kampus Besai di Melbourne,” ku iya.
Iya madah munyi nya maya bejadika Licha Pemereti Senentang Autisme Renggat Nengeri Sarawak 2023 diatur ba Sekula Seni Sarawak Malaysia Kuching, kemari.
Ku tandu Abang Johari, kebendar nya sebagi ari atur intervensi dalam nyapai juluk ngangkatka kualiti enggau sistem belajar ke lebih ngasi ungkup raban OKU.
“Kitai bekerejasama enggau Opis Menteri Nancy (Pemansang Orang Indu, Ruang Bilik enggau Komuniti) nyadi kitai ba Sarawak kitai nambah.
“Enti Nancy meri mayuh kitai deka nambahka mayuh agi nya tepulai ngagai Perintah Besai enggau nama pekara ke beguna kerejasama ti meri atur ke manah enggau meri pemaik ngagai bala anak kitai,” ku iya.
Ungkup penemu, urung 3885 iku autisme di rikodka ba nengeri tu.-TVS
