DEBAK, 29 Okt: Penembu Palan Aktviti Orang Lunggar Umur (PAWE) ditu dikearap ulih ngelanchar ke agi operasyen enggau program diatur ungkup raban orang lunggar umur ba Debak.
Sapit Menteri Pemansang Orang Indu, Anak Mit enggau Komuniti Datuk Mohd Razi Sitam madah, arapka mayuh agi aktiviti ulih diatur ba endur sereta meri pemaik ngagai kaban PAWE ba Pelilih Mit Debak.
Ku Razi, PAWE nya tembu digaga nengah agih belanja sepenyampau RM100,000 ari Perintah Besai.
“Opis PAWE tu ila mega deka nyadi siti palan endur bemacham aktiviti orang lunggar umur bejalaika ni bagi program ke ulih dipejalai sida ditu ila,” ku iya.
Iya madah munyi nya pengudah bejadika Palan Aktiviti Orang Lunggar Umur (PAWE) enggau mesin ATM sereta Opis Kaban Kaunsil Nengeri (ADUN) Saribas ditu, kemari.
Tandu Razi, Opis PAWE ke kunsi begunan enggau Palan Servis Kaban Kaunsil Nengeri (ADUN) Saribas sereta Opis Sapit Menteri Pemansang Orang Indu, Anak Mit enggau Komuniti nya deka nyadi opis satelit Opis Pengelantang Pendiau (JKM) di Betong.
“Ba Palan Komuniti Debak tu bisi siti PAWE siti agi Opis Palan Servis Dun enggau Opis Sapit Menteri Pemansang Komuniti ke mega deka diambi nyadika Opis Satelit Opis Pengintu Pengelantang (JKM) Betong di Debak lalu ba siti tebing ditu endur engkah mesin ATM,” ku iya.
Nitih ke penerang Opis Orang Lunggar Umur (PAWE) Debak tu mega nyadi opis PAWE kepenudi dibuka ba Sarawak.-TVS
