SARATOK, 27 Okt: Pemujur ke udah dijapai Gerempung Orang Berikan Sitak (PNK) Kabong patut nyadika chunto ngagai gerempung orang berikan bukai di menua tu.
Chairman Kaunsil Pemansang Ikan Malaysia (LKIM) Muhammad Faiz Dato Fadzil madah, tu berindik ari pnk kabong udah mujur bejalaika bemacham aktiviti ekonomi asil ari inisiatif sida empu sereta mayuh meri pemaik ngagai kaban gerempung nya.
“Aku berasai gaga ninga jaku dipansutka menyadi kitai Dhaimizan tadi ke nerangka pasal rikod manah Gerempung Orang Berikan Kabong.
“Mayuh aktiviti ekonomi ke benung dipejalai, nyadi aku ngarapka PNK tu ulih nyadi chunto ngagai PNK bukai.
“Sida (PNK Kabong) ulih bediri kediri (ngiga belanja) lalu kitai endang patut enggau naka ulih ngiga projek ke ulih meri pemaik ngagai kaban gerempung,” ku iya.
Muhammad Faiz mansutka pekara nya maya bejadika Program Rahmah Mesra Madani Chairman LKIM begulai enggau PNK Kabong diatur ba Mini Komplek LKIM Kabong, kemari.
Ku tandu Muhammad Faiz, udah tu LKIM deka terus meri sukung tauka bantu ngagai semua pengawa ke diperambu Gerempung Orang Berikan Kabong.
“Kitai ba LKIM deka meri sukung penuh enggau sebarang bantu sereta tulung ke diguna udah tu dikena nentuka semua projek ekonomi diperambu sida PNK Kabong tu ulih dipujurka jemah,”ku iya.
Ungkup penemu, PNK Kabong ditumbuh kena 4 June 1981 sereta bisi 11 iti pampang iya nya pampang Alit, Kupang, Batang Maro, Paloh, Sessang, Perpat, Empelam, Sungai Pasir, Saratok, Kaba nyengkaum Kabong empu.
Langkar ekonomi ti dikemeranka PNK Kabong naka tu iya nya projek bedagang minyak petrol enggau disil, projek dagang batu ais, projek dagang ikan, gis, sarang burung lelayang enggau ke bukai.-TVS
