SARATOK, 27 Okt: Bisi 90 iti projek Transformasyen Menua Pesisir (RTP) ungkup sitak Kunsil Nengeri (DUN) Krian kenyau ari 2021 nyentuk 2023.
Kaban Kaunsil Nengeri (ADUN) Krian Friday Belik madah, naka diatu semua projek nya bejalai lanchar sereta nadai penanggul nitihka ikas proses siti-siti projek.
“Projek RTP ba DUN Krian ke udah dikemendar kenyau ari taun 2021 nyentuk 2023 bisi dalam 90 iti.
“Suba kitai bisi 19 iti lalu ari 19 iti nya nadai mayuh agi iyaka apin digaga lalu benung digaga diatu bisi tiga iti.
“Berebak enggau nya, bisi 36 iti RTP projek deka digaga semina nganti taba ari raban ejensi pengereja pengawa ditangkan 34 agi ba renggat benung dipejalaika,” ku iya.
Friday madah munyi nya lebuh dirandau TVS pengudah bejadika Program One Step Beyond sereta bejadika Kelab Pecinta Alam Sekitar (PALS) ke diatur ba SK Sungai Klampai, kemari.
Nya alai, ku Friday, pupurata kesemua 90 iti projek nya naka diatu udah bejalai enggau tembu manggai 40 peratus.
“Naka diatu ari 90 iti RTP ba Dun Krian nya tau dikumbai kitai ari segi pejalai iya kira 40 peratus udah tembu.
“Nya alai kitai minta kerejasama ari ejensi pengereja pengawa laban agih belanja udah bisi diberi (perintah).
“Nyadi projek tu patut dirumban dikena meri pengelantang ngagai rayat,” ku iya.
Ku terang Friday mega, empas ari penembu projek nya jemah deka ngidupka baru ekonomi rayat ke diau besemak.
Berebak enggau nya, Friday madah diri tepantup ati meda projek RTP ke benung dipejalaika ba sitak Krian.-TVS
