SARATOK, 26 Okt: Projek Ngemanah Jalai Roban Lama deka dipejalai ba renggat kedua nengah agih ari Ejensi Pemansang Menua Betong (BDDA).
Kaban Kunsil Nengeri (ADUN) Krian Friday Belik madah, Jalai Roban Lama endang patut dikemanah laban entukar nyau majak mayuh kelimpah suah endur penusah aksiden nyadi.
“Jalai Roban Lama tu siti ari projek ke udah diungkupka perintah belanja nengah Ejensi Pemansang Menua Betong (BDDA) ungkup taun 2023.
“Nya alai, kitai udah tu deka ngemanah agi Jalai Roban Lama nya,” ku iya.
Iya madah munyi nya pengudah bejadika Program Akademik One Step Beyond seraya Bejadika Kelab Pecinta Alam Sekitar (PALS) diatur Sekula Primari (SK) Sungai Klampai, pagi tadi.
Nangkan ke nya ku Friday, naka diatu pansik bekaul enggau pelin jalai nya benung digaga serera diserenih raban opis ke bekaul.
“Diatu sida ejensi pengatur pengawa benung ngaga tempa tukuh laban dia (Jalai Roban Lama) dipadahka suah amat nyadi penusah aksiden nyentuk bisi bebadi nyawa.
“Nya alai sigi patut jalai nya diaduka manah agi ungkup penguna jalai raya laban diatu orang enda berapa rindu ngena P-Turn laban kelalu jauh.
“Sida suah agi deka ngena Jalai Roban Lama tu lebih agi enti deka ke Sarikei, Roban laban jalai tu chukup muntang.
“Tambah mega penyampau entukar makin hari makin mayuh, nyadi jalai pan endang patut digaga menyana agi,” ku terang iya.-TVS
