KUALA LUMPUR, 22 Okt: Gerempung Veteran Soldadu Malaysia (PVATM) deka nganjung memorandum minta penyebela pinchin veteran ATM ngagai Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah enda lama agi.
Presiden PVATM Malaysia, Kapten (B) Datuk Sharuddin Omar madah, isu nya udah lebih 10 taun ditagih, tang agi nadai sebarang atur bekaul enggau pemutus ke nyemetak didinga nyentuk ke sehari tu.
Iya madah penyampau Veteran ATM ke sama bela nuntut penyeleba pinchin sebedau Januari 2013 iya nya 78,546 iku, beumur entara 52 taun ke 99 taun lalu 80 peratus ari nya ba kategori orang lunggar umur.
“Nyadi kami ngaga pemutus iya nya sehari tu kami patut mantaika siti timbal ke diasai aku chukup likun, ngangkatka nama kami begempuru begulai engga semua pangari tu laban deka mantaika pengirau ati kami…”
“…senentang isu penyebela pinchin ke udah diteju chukup lama tang nadai siti pemutus pan timbal ari perintah dikena nyaga raban pinchin ke udah pinchin sebedau 2013 tu,” ku Sharuddin nengah sebengkah aum pemberita ke diatur ba Wisma Pahlawan ditu, empai lama.
Dulu ari nya iya enggau raban PVATM bisi ngatur gempuru likun ba pelaman Hotel Grand Barakah di Ampang, Selangor ke nyadi palan Gempuru Besai Ninting Taun Menua Ke-97 PVATM.
Nengah gempuru besai nya, PVATM bela sepenemu ngaga pemutus nganjung memorandum nya laban Yang di-Pertuan Agong endang Ketuai Pemadu Tinggi ATM lalu dijangka deka disua pengudah mansau timpuh 14 hari berengkah Hari Minggu.
Datuk Sharuddin mega nuntut bantu belanja pengidup RM300 sebulan ungkup veteran ATM ke nadai pinchin beumur lebih 60 taun dipejalaika enggau nadai sebarang kelikuh.
“kami minta diberi BSH RM300 ngagai sida tu chara automatik enggau nadai sebarang kelikuh…”
“Aku ngarapka tu ukai semina bantu belanja pengidup, nya siti basa raban perintah ngagai servis ke udah digaga sida,” ku tandu Sharuddin.
Sebedau tu perintah bisi madah deka meri Bantu Belanja Pengidup (BSH) RM300 sebulan ngagai Veteran Ke Nadai Pinchin berengkah umur 60 taun nyadi danji enggau komitmen perintah dikena nyaga pengelantang raban orang gawa perintah.-TVS
