KUALA LUMPUR, 22 Oktober: Perintah Sarawak terus menatika isu suntuk pengajar ke benung ditapi nengeri tu.
Premier sarawak, Datuk Patinggi Tan Sri Abang Johari Tun Openg madahka, dikena mutarka penanggul nya dia perintah nengeri benung berunding enggau Opis Menteri Pelajar Malaysia (KPM) ngambika Institusyen Pelajar Tinggi (IPT) baka universiti di Sarawak dikemendar nyendiaka kus narak pengajar awakka ulih ngisi pengawa puang urung 3,000 iku pengajar ke agi kurang di Sarawak.
Iya madahka, nya siti rapat dikena mutarka penanggul suntuk pengajar ke benung ditapi Sarawak.
“Tu siti chara dikena mantu mutarka penanggul suntuk pengajar di Sarawak. Kitai mega meri perati ngagai anak Sarawak ke ulih diberi latih nyadi pengajar enggau ngajar ba sekula kitai.
“Pekara tu benung dipejalaika kitai ba renggat perintah. Pia mega, Swinburne University mega deka nyendiaka latih ngagai sida ke deka nyadi pengajar ti diaku Opis Menteri Pelajar (KPM),” ku iya maya nyaut tanya ari siku nembiak nyerumba Randau Mensia Mayuh ke diatur beserimbai Program Lan Berambeh Anak Sarawak ke diatur lemai kemari.
Abang Johari nerangka, perintah sarawak benung bekerejasama dalam ngemujurka juluk nya seraya ulih ngisi 3,000 pangku pengawa puang pengajar di Sarawak.
Ngelansa pekara bukai ke ditanya bala nembiak, iya madahka perintah Sarawak nengah Opis Menteri Pelajar, Inovasyen enggau Pemansang Bakat Sarawak (MEITD) meri perati ngagai bidang Latih Teknikal enggau Pelajar Vokasional (TVET) sereta bidang Sains, Teknologi, Injiniring enggau Matematik (STEM) ungkup pemansang menua.
“Nya alai aku udah ngagai perintah besai, lebih agi menteri pelajar ngambi perati sekula baru ti mesti disikap enggau makmal tauka lab.
“Tu chukup beguna dikena nentuka anak kitai ulih belajar subjek sains. Perintah Sarawak mega deka ngemansangka makmal ti ulih dikunsi semua sekula dalam siti pelilih. Tu deka digaga ba serata Sarawak,” tandu iya. – TVS
