SARATOK, 21 Okt: Kaban Kunsil Nengeri (ADUN) Krian Friday Belik deka meda Pelilih Mit Nanga Budu lebih mansang ari sebedau tu.
Ku iya, tu seriris enggau pemisi Ejensi Pemansang Bagi Menua Betong (BDDA) nyendiaka agih belanja dikena ngerumban pemansang ke patut ungkup taun baru.
“Pelilih Mit Nanga Budu tu udah lama diangkat ngagai pelilih mit tang naka diatu apin bisi tentu utai nyengala utai besai diaduka dia.
“Nya alai, nengah pemisi Ejensi Pemansang Bagi Menua Betong (BDDA) ke ulih meri kitai belanja dikena ngaduka pemansang nyadi aku arapka ba taun baru ila bisi utai (pemansang) udah dipeda dia,” ku iya.
Friday mansutka pekara nya pengudah tembu ngulu ke sebengkah aum ke diatur ba Opis Pelilih Saratok, empai lama.
Nangkan ke nya, Friday madah penembu begunan baru Opis Pelilih Mit Nanga Budu ila dikearap ulih meri peransang ngagai raban pengereja pengawa dia ngatur servis ke diguna rayat.
“Awak ke bala pegawai kitai ke gawa ba Opis Pelilih Mit Nanga Budu nya ulih gawa enggau lebih ransing agi ngagai rayat mayuh ba Ulu Krian.
“Menua Budu, Kabo beserimbai enggau Pelilih Mit Nanga Budu nyadi mayuh sida iya diatu kekadang nyau limpang ke opis bukai laban ke nadai chukup servis ba Nanga Budu,” ku terang iya.
Nya alai, ku Friday jemah sida di Nanga Budu enda ibuh agi ke bukai laban semua penanggul ke nekul deka ulih diputar ba Opis Pelilih Nanga Budu empu.-TVS
