SARATOK, 20 Okt: Peminta rayat rumah panjai ti deka ngentak rumah baru nengah Projek Rumah Spektra Permata (RSP) di Krian deka dibantai ba aum Kunsil Nengeri (DUN) dulu.
Kaban Kunsil Nengeri (ADUN) Krian Friday Belik madah, arapka peminta nya ulih dikemendarka perintah dikena mutarka penanggul rebak baru ti deka berumah tang suntuk taba endur ngentak rumah baru.
Ku tandu Friday diatu majak mayuh rebak baru deka nampung rumah panjai taja sida udah bisi meli rumah ba mengeri.
Tang lebuh sida pulai ke menua taba rumah panjai udah sekut nyadi pekara nya deka diputar nengah chara minta Projek Spektra Permata.
“Mayuh taba rumah panjai nya tadi udah sekut lalu nadai agi alai nampung.
“Nya alai aku deka berunding ngiga beberapa iti tempat tauka tanah lalu nguji ngena chara baru mai chara baru ba menua pesisir lebih agi ba menua rumah panjai kitai Iban.
“Kitai nguji ngena chara baru diatu iya nya ngena projek rumah ke dikumbai Projek Spektra (Permata),” ku iya.
Iya madah munyi nya lebuh dirandau TVS pengudah nemuai seraya meresa taba rumah baru ungkup 12 pintu peranak Rumah Panjai Kunjan ba Bila Dua ditu, kemari.
Nya alai, ku Friday, iya chukup andal ke peminta nya dikemendar lalu nyadi siti ari agenda ti deka dibantaika iya ba aum dun ke deka datai.
“Utai tu deka dibantai ngagai Perintah Sarawak (nuju opis menteri bekaul) dulu enti iya dikemendar baru kitai berundingka taba.
“Utai nya deka dibantai lalu nyadi siti ari agenda deka disebut aku maya Aum DUN ke diatur bulan November tu,” ku iya.
Ngelansa pekara bekaul, Friday madah taba endur ngentak rumah baru nya udah tembu disungkur dalam timpuh dua minggu aja.
Ku iya, taba sepemanjai 200 kaki enggau buka pemesai 100 kaki nya digaga nguna agih belanja sepenyampau RM30, 000.
Sama bisi datai nyempulang pejalai Friday tiga iku kaunselor enggau semilan iku tuai rumah besemak.-TVS
