BETONG, 19 Okt: Institusyen bekaul enggau Opis Pelajar Tinggi (KPT) diperansang patut chakah agi ngatur program meri penerang bekaul enggau bidang Latih Teknikal Enggau Pelajar Vokasional (TVET) ngagai komuniti menua pesisir.
Sapit Menteri Pengelantang Indu, Anak Mit enggau Komuniti (KPWKK) Sarawak Datuk Mohd Razi Sitam madah, tu berindik ari penyampau nembiak menua pesisir ke ngambi kus tauka pelajar ba bidang TVET agi mimit.
“Aku ngarapka udah tu mayuh agi institusyen bekaul tauka opis tu empu (KPT) ulih nambah ke agi program meri penyedar ngagai mensia mayuh senentang bidang TVET.
“Baka dipadah ngagai aku tadi penyampau nembiak belajar dalam bidang TVET tu agi mimit lalu pekara tu patut diberi perati.
“IPT empu patut nerang ngagai komuniti senentang pemesai guna pelajar bidang TVET,” ku iya.
Razi ke mega Kaban Kunsil Nengeri (ADUN) Saribas madah munyi nya sepengudah bejadika Program Outreach UPU2U 2023 Zon Sarawak ngarika Sapit Premier Sarawak Datuk Amar Douglas Uggah Embas ba Diwan Lumba Tan Sri Datuk Amar Stephen Kalong Ningkan ditu, kemari.
Ku tandu Razi, ba dunya kemaya hari tu bidang TVET ukai agi nyadi siti pilih tauka enda tang nyadi bidang pelajar ke mesti dipelajarka raban rebak baru.
“Bidang Teknikal enggau Vokasional diatu ukai agi nyadi siti bidang ti dipilih tauka enda tang tang mesti dipilih laban peluang gawa dalam bidamg TVET tu jemah chukup mayuh.
“Pia mega ba pemansang ekonomi dunya nyengkaum Malaysia diatu mayuh bepelasarka bidang baka tu iya nya nguna raban ke landik ba teknikal enggau vokasional,” ku iya.
Sama bisi datai, Mandal Chanselor UNIMAS Prof Datuk Dr Mohamad Kadim Suaidi, Direktor Begian Penama Pelajar IPTA Opis Pelajar Tingi (JPT) Mohd Adiel Azhar Harun enggau ke bukai.-TVS
