DEBAK, 16 Okt: Kerejasama antara komuniti lebih agi raban apai indai dilalau patut nemu chara nyeliahka bala anak ari teparuk ngereja ulah ke enda menuku.
Sapit Menteri Pemansang Orang Indu, Anak Mit enggau Komuniti (KPWKK) Sarawak Datuk Mohd Razi Sitam madah, bepelasarka rikod taun 2022 Pelilih Mit Debak antara pelilih menua mit di Betong ke pemadu mayuh ngerikod kes nembiak betubuh bisi.
“Ba renggat Pelilih Mit Debak ditu empu kita meda penyampau kes penanggul rama bisi nambah reti iya bisi nambah ngaul nembiak ke betubuh bisi.
“Ba taun 2022 suba kes nya ngerikod pemadu mayuh tauka lumur satu kes nembiak betubuh bisi ba renggat Bagi Menua Betong.
“Reti nya kes ke mayuh nyadi ba Bagi Betong tu tebal agi datai ari Pelilih Mit Debak,” ku iya.
Razi ke mega Kaban Kunsil Nengeri (ADUN) Saribas mansutka pekara nya maya bejadika Program ‘Remaja Bijak Remaja Sihat’ diatur Opis Pengelantang Pendiau Raban Bansa (KEMAS) Pampang Betong Ba Diwan Penyerakup ditu, ensana.
Nya alai, ku Razi pekara nya mesti diputar ari kerejasama rat raban apai indai nembiak enggau komuniti nengah chara ngajar bala anak diri senentang pekara ke badas enggau ke enda badas dikereja.
“Pemereti kitai ke nyadi orang tuai mesti nemu tanggungpengawa diri lalu sama nguji ngurangka tauka abis nadai ulih narak ulah anak diri empu awak ngelala bagi utai ke badas enggau ke enda badas,” ku iya.
Ungkup penemu, tuju program sehari nya diatur dikena ngiri pemereti ati ngagai raban nembiak bekaul enggau penanggul rama sereta pengerai.
Urung 200 iku nembiak ari Sekula Sekondari (SMK) Saribas bisi dikangau ngulu program nya.
Sama bisi datai ngulu program nya Pegawai Nguasa Pelilih Mit Debak Mohammad Hafiz Kepli, Chairman Panel Penyanding Penemu Klinik Pengerai Debak, Penghulu Abang Kiprawi Abang Rukaili enggau ke bukai.-TVS
