BETONG, 15 Okt: Rayat di sitak Kunsil Nengeri (DUN) Saribas ngarapka sitak nya ulih diangkat nyadi siti ari sitak parlimen baru jemah.
Tuai Indu Parti Pesaka Bumiputera Bersatu (PBB) Pampang Saribas Rohana Julai madah, nyema pekara nya nyadi nyadi tentu nya deka ngelengkaska agi pemansang di menua Saribas.
“Ba penemu aku, laban ke nyadi nyadi Tuai Indu Pampang N.53 Saribas endang chukup ngarap ke Saribas tu ila ulih diangkat nyadi siti ari sitak parlimen (baru) dalam Zon Betong.
“Kebuah pia laban diatu sitak DUN Saribas baruh Parlimen Betong, nyadi enti peminta tu nyadi nyata nya tentu deka ngelengkas agi pemansang di Saribas dudi hari,” ku iya.
Udah nya, bela nyukung buah penemu senentang peminta ke sebaka nya, Temenggung Piee Alwi.
Ku Piee Alwi, Saribas endang patut diangkat nyadi sitak parlimen laban penyampau pengundi majak nambah sereta ngembuan bungkur menua ti besai.
“Endang patut ba aku Saribas tu diangkat nyadi sitak Parlimen…baka ditemu kitai menua Saribas tu ngembuan mayuh genturung pendiau.
“Nya alai, laban ke nyadi Tuai Raban Bansa ditu aku endang sigi nyukung sitak parlimen Saribas diangkat,” ku iya.
Udah nya, siku peranak Saribas, Azman Derus madah, iya ngarap ke menua Saribas jampat agi mansang enti sitak nya mujur diangkat nyadi parlimen jemah.
“Enti menua Saribas tu ulih diangkat nyadi Parlimen nyadi aku endang sigi ngarap amat menua Saribas tu ulih nyadi siti ari sitak Parlimen ngambi ke pemansang ulih diatur enggau lanchar agi sebaka enggau menua bukai ke udah jauh mansang diatu ,” ku iya.
Sida tiga bela mansutka jaku timbal nya nyerumba Konvensyen Khas Parti Pesaka Bumiputera Bersatu (PBB) Zon Betong sebedau tu.
Ungkup penemu, bepelasarka penyampau pengundi ba suku keterubah bulan March 2023 penyampau pengundi ba sitak DUN saribas nyengkaum undi 18 diatu udah mangai 20, 000 iku.
Udah nya, dibaruh DUN Saribas bisi empat bengkah opis pelilih iya nya Betong, Pusa, Debak enggau Spaoh.-TVS
