BETONG, 15 Okt: Opis Menteri Pemansang Tumpuk Pendiau enggau Wilayah (KKDW) merambu deka numbuh ke Stesyen Pengumpul Ai Getah di nengeri tu nengah kerejasama Kaunsil Pemansang Pekebun Mit Penyual Getah (RISDA).
Sapit Menteri KKDW, Datuk Rubiah Wang madah, tu berindik ari gerah Menteri KKDW Datuk Seri Ahmad Zahid Hamidi sebedau tu ti deka ke Stesyen Pengumpul Ai Getah nya ditumbuh mayuh agi di serata menua.
“Kebendar KKDW bisi ngembuan pelin dikena nentu ke penambah penatai pemisi ke lebih manah ungkup raban pekebun mit ke ngelama tu semina bepanggai ba asil bejual ke kelapis getah aja.
“Nyadi taun tu Menteri (KKDW) udah ngasuh RISDA numbuhka mayuh agi Stesyen Pengumpul Ai Getah (latek) ngambika raban pekebun getah mit tu ulih mayuh agi bejual ai getah ari kelapis getah lalu tu udah mayuh dipejalaika di Semenanjung Malaysia tang apin bisi di Sarawak,” ku iya.
Datuk Rubiah madah munyi nya ngagai media pengudah bejadika Program Kimpin Raban Penyungkak Produktiviti Getah Tikas Nengeri Sarawak 2023 ba Diwan Panglima Rentap ditu, kemari.
Taja pia ku iya pengawa numbuhka Stesyen Pengumpul Ai Getah nya enda ulih dikemujurka tekala nya enti nadai sukung tegut ari raban pekebun getah di menua tu enggau penyikap infrastruktur ke menyana.
“Kitai mesti bisi pelin lebih agi ari sukut ngemesaika bungkur kebun getah lebih agi kebun ti lama enda dikereja.
“Kebuah pia, laban enti kitai deka ngaga siti stesyen kitai mesti bisi siti awak ke ulih alai ngelumuka siti-siti sitak ke ngembuan perengkaguna ari sukut jalai sukut telekomunikasyen enggau ke bukai.
“Udah nya, ngelansa pasal kilang ti deka meli ai getah nya ila… tu agi dalam perambu kitai naka ke diatu di Sarawak,” ku terang iya.
Udah nya, Rubiah madah semua pekara diperambu ungkup timpuh pandak lalu iya udah ngerah sida RISDA ngambi meratika pekara tu ngambika utai tu ulih dibai ke Sarawak.
Sama bisi datai ngulu program tu Kaban Parlimen Betong Dr Richard Rapu, Direktor RISDA Sarawak Shaharuddin Saberi enggau ke bukai.-TVS
