SARATOK, 13 Okt: Pesta Roban 2023 sebedau tu ditaga deka diatur kena 27 nyentuk 29 Oktober tang udah dilanjar ngagai haribulan ke baru iya nya 10 nyentuk 12 November ketegal penanggul teknikal.
Kaban Kunsil Nengeri (ADUN) Kalaka Mohd Duri madah, bisi 18 program tauka pekit udah disetuju komiti pengatur pengerami deka diatur dikena ngerichahka Pesta Roban 2023.
“Asil ari aum ti ketiga dia Pesta Roban udah diputuska ngundan 18 bengkah pekit tauka aktiviti.
“Sekeda ari aktiviti baka ngaga Replika Rumah Panjai, eksibisyen, bedaja, lumba rayat nyengkaum Pekit Nyumpit, Pekit Mansuh ungkup bansa China, Melayu enggau Iban,” ku iya.
Iya madah munyi nya pengudah tembu Aum Pesta Roban 2023 diatur ba Bilik Aum Sitak Pemansang Betanam Betupi Penuh (IADA) Kalaka Saribas Betong ditu, empai lama.
Ku terang Mohd Duri, kebuah haribulan ngatur pengerami diubah ketegal bisi penanggul ke enda ulih diseliah.
“Kitai ngelanjar ke timpuh enggau haribulan ke baru iya nya 10, 11 enggau 12 laban bisi penanggul teknikal.
“Mayuh aktiviti disadang ulih matak penatai temuai ngagai Pesta Roban berindik ari pengerami tu lama udah enda diatur,” ku iya.
Ungkup penemu, tuju ngatur Pesta Roban dikena negapka nyerakup pupu bansa lebih agi di pelilih Roban.
Nya alai, mensia mayuh bela ditesau sampal datai sama meri sukung sereta ngerichahka agi pengerami nya ke deka diatur ba Pasar Roban empu.
Sekeda aktiviti ti disadang ulih matak temuai ngulu pengerami tu ila iya nya Pekit Batak Tali Atas Ai, Pekit Mansuh Tiga Serumpun, bejual dalam replika rumah panjai enggau mayuh agi ke bukai.-TVS
