MALUDAM, 13 Okt: Sapit Menteri Pengelantang Indu, Anak Mit enggau Komuniti Sarawak Mohd Razi Sitam ngarapka Sarawak nerima penyampau agih belanja mayuh agi ari ke udah-udah.
Ku iya, abis nadai bajet ke diterima serak tu manggai RM20 bilion ngambika mayuh agi projek pemansang ulih dikemujur di nengeri tu.
“Enti ba penemu aku siku agih sepenyampau empat, lima bilion baka ke udah ari Perintah Besai ngagai Sarawak sigi enda chukup laban kitai beguna ke belanja ke mayuh abis nadai manggai RM10 bilion tauka nyentuk RM20 bilion,” ku iya.
Razi ke mega Kaban Kunsil Nengeri (ADUN) Saribas madah ari agih belanja ti besai nya ulih ngelengkas ke agi pemansang projek ke udah dilanggur di Sarawak.
“Tu chukup beguna dikena ngelengkas ke projek pemansang infrastruktur tauka program pemansang di Sarawak lebih agi iya ke senutuk enggau juluk Perintah Besai ti deka ngemanah agi tikas pemansang ba menua pesisir sebaka engau ba kandang mengeri,” ku tandu iya.
Razi mansutka pekara nya lebuh dipinta meri penemu bekaul enggau Bajet 2024 ti deka dibantaika Menteri Besai Datuk Seri Anwar Ibrahim urung pukul 4 lemai tu legi.
Ungkup rikod, taun tu tadi Sarawak nerima sepenyampau RM5.6 bilion ari Perintah Besai.-TVS
