DEBAK, 11 Okt: Sapit Menteri Indu, Nembiak Mit enggau Pengelantang Komuniti (KPWKK), Mohd Razi Sitam madah, Padang Riveria Debak deka terus diangkat manah nengah agih belanja Projek Transformasyen Menua Pesisir (RTP).
Berindik ari nya, iya ngarap mensia mayuh ulih nguna manah perengkaguna ti udah disediaka endur ngatur aktiviti ke bekaul.
“Diatu kitai ulih meda proses deka ngangkatmanah ‘Granstand’ ke bisi atap dikena meri pengelantang ngagai mensia mayuh enggau padang tu deka dipejalai nengah Projek Transformasyen Menua Pesisir (RTP) dikena ngemanahka nama ke patut ba padang tu,” ku iya.
Razi Sitam ke mega Kaban Kunsil Nengeri (ADUN) Saribas pengudah bejadika Pekit Lumba Ninting Taun Ti Ke -58 Sekula Primari (SK) Datuk Bandar Debak ba Padang Riveria Debak ditu, ensana.
Nangkan ke nya, iya mega madahka, pekara tu patut diberi perati laban Padang Riveria Debak iya nya perengkaguna ti diguna mensia mayuh ke besemak dia.
“Kitai mega merambu deka ngaga palan entepan entukar enggau ngaga lampu limpah ba padang tu dikena ngemudahka mensia mayuh laban padang tu siti palan ti strategik laban ba tengah-tengah Pasar Debak ngambika mensia mayuh mudah nguna perengkaguna ke bisi di Padang Riveria ditu,” ku iya. -TVS
