SARATOK, 9 Okt: Rayat ba tiga sitak Kunsil Nengeri (DUN) iya nya Kalaka, Kabong enggau Krian diperansang terus nyukung perintah Gabungan Parti Sarawak (GPS).
Speaker DUN Sarawak, Tan Sri Datuk Amar Mohamad Asfia Awang Nasar madah, sukung ari rayat menua tu ngagai GPS chukup beguna dikena nentu ke menua enggau rayat ba ketiga-tiga sitak nya terus bulih pemansang.
“Bantu ari aku tu enda mayuh kebendar tuju aku kitu (Saratok) deka betimpai mua enggau tuai renggat tinggi ari Kabong enggau Kalaka sereta Krian.
“Ba DUN Sarawak bisi 82 penuduk, 76 ari nya dipenggi GPS tiga enggi Parti Sarawak Bersatu (PSB) dua DAP siti Independent lalu Independent tu pan menang ukai atas tikit Independent tang pansut ari PSB.
“Nyadi penyakal nadai ulih ngaga nama-nama dalam DUN laban 76 penuduk udah dipegai GPS,” ku iya.
Asfia madah munyi nya lebuh bejaku rambau Program Nyuaka Bantu Ngagai Masjid Enggau Surau dalam sitak Kalaka ba Masjid Al-Muhtadin ditu, pagi tadi.
Nangkan ke nya ku iya, rayat tauka pengundi ba tiga bengkah sitak nya mega patut nemu bida siti-siti parti politik ke ulih mai pemansang enggau pemujur ngagai sida.
Ngelansa pasal program nya, bisi 15 buah masjid enggau surau ba DUN Kalaka nerima agih belanja sepenyampau RM10, 000 ungkup masjid enggau surau diberi RM5,000.
Sama bisi datai ADUN Kalaka Mohd Duri, ex-ADUN Kabong Datuk Wahab Aziz, bala tuai opis perintah enggau ke bukai.-TVS
