BETONG, 9 Okt: Perambu deka nambah ke penyampau sitak parlimen baru ba Sarawak nyengkaum ba bagi menua Betong endang patut.
Lebuh meri timbal senentang pekara nya Kaban Kunsil Nengeri (ADUN) Kalaka Mohd Duri madah, ari penyampau penuduk parlimen ke ditambah nya ila tentu ulih mantu ngelengkaska agi pemansang ke benung dirandaka rayat Sarawak senutuk enggau Sempekat Malaysia 1963 (MA63).
“Bekaul enggau pekara deka nambah ke penyampau penuduk parlimen kitai sigi nyukung laban ari pemujur penyampau sitak parlimen nya ditambah reti iya nyarih agi nyawa kitai didinga.
“Pia mega tentu mayuh pemansang ke dirandaka kitai (rayat Sarawak) ulih dikemujur.
“Kelimpah ari nya, baka bajet pan tentu deka nambah sereta ngujungka sesiku kaban parlimen bepeluang mantaika sebana rayat senutuk enggau MA63,” ku iya.
Iya madah munyi nya lebuh dirandau media pengudah tembu Konvosyen Khas Parti Pesaka Bumiputera Bersatu (PBB) Zon Betong diatur ba Dewan Lumba Tan Sri Datuk Amar Stephen Kalong Ningkan, kemari.
Nangkan ke nya, ku Mohd Duri ari penambah penuduk parlimen nya mega deka ngujung ke sitak pegai siku-siku kaban parlimen ulih dikedut agi awak ke pengawa ngatur pemansang ulih dirumban.
“Bekau ari penyampau penuduk parlimen nya ditambah reti iya sitak ke dipegai siku-siku pengari rayat deka mit agi.
“Kelimpah ari nya mega, pemansang ke dilanggur mega deka lengkas agi dikemujur asil ari bajet ke betambah.
Dulu agi ari nya, Menteri Utiliti enggau Telekomunikasyen Sarawak, Datuk Julaihi Narawi bisi mantaika semilan iti mosyen.
Mosyen ke lumur semilan iya nya senentang penambah penuduk parlimen di Sarawak nya chukup senutuk enggau MA63 ti ngungkupka satu pertiga ari penyampau semua sitak parlimen di Malaysia.
Ungkup rikod, naka diatu Sarawak semina bisi diungkupka 31 iti penuduk parlimen.-TVS
