BETONG, 8 Okt: Kaban Kunsil Nengeri (ADUN) Layar, Dato Gerald Rentap Jabu madah, sitak Nanga Mujau jemah deka dikemansang nyadi palan komersial tauka sebuah pasar.
Ku iya, tu berindik ari sitak Nanga Mujau diatu udah ngembuan perengkaguna pemun ti menyana baka bekal karan 24 jam, bekal ai beresi enggau jalai alun ti menyana.
“Kitai merambu menua tu dikemansangka nyadi siti palan pengatur pengawa menua pesisir tauka palan servis.
“Dalam perambu nya, kitai meda ari sukut penyampau mensia ditu enggau gaya jalai alun sereta enggau infrastruktur pemun bukai baka api, ai enggau karan (udah bisi magang).
“Nyadi kitai ulih ngemansang ke menua tu baka ngaga iya nyadi palan alai bedaja, makit tauka kedai (pasar) ditu jemah,” ku iya.
Rentap ke mega Sapit Menteri Nembiak, Lumba enggau Main Sereta Pedagang Sarawak madah munyi nya rambau nyempulang pejalai Sapit Premier Sarawak, Datuk Amar Douglas Uggah Embas Nyuaka Kereban Perubat Pemun Ari Petronas ba Rumah Isop, Nanga Mujau, ensana.
Nangkan ke nya, Rentap madah madah ari pemujur perambu nya jemah tentu deka muka peluang bedagang ngagai mensia mayuh di Ulu Spak ke dipelabaka bisi diuan lebih 6,000 iku mensia.
“Ari jalan alun ari endur tu (Nanga mujau) ulih rembus ke Muman lalu ke Ulu Skrang.
“Nyadi aku ulih meda mayuh peluang ditambah enggau penyampau tubuh mensia ditu urung lima ngagai enam ribu iku.
“Nya alai, kitai arapka perambu ungkup pemaik rayat dudi hari tu ulih nyadi dikemujur iya ngemansangka sebuah pasar ditu,” ku iya.
Ba program sehari nya Klinik Nanga Mujau bisi nerima kereban perubat pemun enggau kereban ukai perubat beungkus urung lima puluh ribu ringgit nengah Program Tanggungpengawa Rama Korporat (CSR) Petronas.
Sama bisi datai Sapit Premier Sarawak, Datuk Amar Douglas Uggah Embas, Kaban Parlimen Betong Dr Richard Rapu, Direktor Pengatur Petronas LNG Laga Jenggi, Residen Betong Richard M Abunawas enggau Pengari SABAT Datin Rosemarie Wong.-TVS
