BETONG, 8 Okt: Abis nadai 12 sitak parlimen baru ungkup Sarawak antara mosyen dibantai nyerumba Konvensyen Khas Parti Pesaka Bumiputera Bersatu (PBB) Zon Betong seraya tiga ari sitak parlimen ke baru diperambu dalam menua Betong.
Lebuh meri timbal senentang pekara nya Chairman PBB Pampang Saribas, Mohamad Razi Sitam madah, mosyen nya udah dirandau enggau pengari rayat di sitak Betong enggau ngarap diberi perati enggau diperundingka Komiti Pengawa Bepilih Besai (SPR).
Ku terang Razi, pemutus mantaika mosyen nya digaga sepengudah beratika sukut logistik, pemesai bungkur menua enggau pemayuh rayat ke nguan sesebengkah sitak nya.
Nya alai, iya ngarapka penambah sitak parlimen baru nya ila ila ukai semina ungkup Betong aja tang mega nyerangkung selampur Sarawak.
“Mosyen ti dibantai Datuk Julaihi Narawi nya tadi udah disetuju semua kami (kaban PBB) ari 14 DUN ungkup Zon Betong.
“Iya nya mungkur kaban PBB ari menua Batang Lupar, Betong, Simanggang nyengkaum Lubok Antu sereta Saratok.
“Kami mega minta menua Betong ditambah tiga agi sitak parlimen baru,” ku iya.
Razi ke mega Kaban Kunsil Nengeri (ADUN) Saribas mansutka timbal nya maya dirandau media sepenguda tembu Konvensyen Khas PBB Zon Betong diatur ba Diwan Lumba Tan Sri Stephen Kalong Ningkan ditu , pagi tadi.
Nangkan ke nya, ku Razi kebuah sida nyukung penuh mosyen nya laban beratika gaya perampa pemesai menua Betong, penyampau rayat udah mayuh sereta ngembuan gaya logistik ke besai lalu beguna mayuh agi pengari rayat ba parlimen.
“Kitai di Sarawak enti nitihka perambu kami deka minta abis nadai 12 iti agi penuduk Parlimen ke baru,” ku tandu iya.
Dulu ari nya, Menteri Utiliti enggau Telekomunikasyen Sarawak, Datuk Julaihi Narawi bisi mantaika 9 iti mosyen.
Ngelansa pasal mosyen kesemilan, Julaihi madahka, penambah penuduk parlimen di Sarawak nya senutuk enggau Sempekat Malaysia 1963 (MA63) ti ngungkupka satu pertiga ari penyampau semua sitak parlimen di Malaysia.
Ungkup penerang, naka diatu Sarawak semina diungkupka 31 iti penuduk parlimen.-TVS
