PUSA, 8 Okt: Bala apai indai ke bisi Anak Timpang Pendiau (OKU) dilalau anang takut ngerejista nama anak sida dipasuk dalam rikod sistem Opis Menteri Pemansang Indu, Anak Mit enggau Pengelantang Komuniti (KPWKK) ngambika anak sida ulih diberi Kad OKU.
Sapit Menteri KPWKK Sarawak, Mohd Razi Sitam madah, Kad OKU nya chukup beguna ngambika anak nerima bantu ke patut ari perintah.
“Siti utai deka dipadah aku ngagai komuniti kitai ditu laban tebal kitai ditu takut ngerejista anak ke bisi timpang pendiau.
“Aku pan enda mereti nama kebuah sida enggai ngerejista anak ke OKU.
“Ukai dipinta kitai sida ada OKU, pemeri ari Petara enggau udah selatan baka nya lalu perintah semampai ngenatika pasal hak raban OKU,” ku iya.
Razi ke mega Kaban Kunsil Nengeri (ADUN) Saribas madah munyi nya lebuh Pengawa Nyuaka Inisiatif Perintah Ngagai Penerima Bantu diatur Opis Pengelantang Pendiau Mensia Mayuh (KEMAS) Bagi Betong ditu, kemari.
Nya alai, Razi madah bemacham bantu bisi disediaka perintah Sarawak ngagai raban OKU dibaruh KPWKK Sarawak.
“Nya alai sida tu disediaka siti kad dikumbai kitai Kad OKU ungkup ngemudah ke sida nerima bemacham inisiatif tauka bantu ari KPWKK baruh Perintah Sarawak.
“Pia mega ukai mina ari sukut bantu aja sida OKU tu mega ulih diangkat nyadi atlit ngari ke menua munyi dipadahka Tuan Haji tadi.
“Maya kami duai ke Phnom Penh, Kemboja apin lama ngulu Lumba Sea setengah ari penyampau bala atlit ti ngari ke Malaysia nya endang atlit kitai OKU ari Sarawak lalu setengah ari penyampau midul diulih mega datai ari atlit OKU kitai ari Sarawak,” ku peransang iya.
Ngelansa pekara bekaul, ku Razi naka 3 September 2023 tu bisi 17,000 iku penerima Kenyalang Gold Card ba bagi menua Betong lalu penerima kad OKU bisi 2,138 iku lalu ba Kampung Tuie aja bisi 58 iku penerima.
Sama bisi datai Direktor Opis KEMAS Sarawak Adana Jed, Pengawai Nguasa Opis Pelilih Mit Debak Hafiz Kepli enggau ke bukai.-TVS
