BETONG, 1 Okt: Pengelikun enggau pengelantang nembiak Sekula Primari (SK) Balingan terus nerima perati Kaban Kunsil Nengeri (ADUN) Saribas, Mohd Razi Sitam.
Beduduk ari nya, Razi madah peminta ngaga baru jalai semin ngelingi padang nganti titi tebelian lama enggau ngaga baru Diwan Sekula Primari (SK) Balingan deka dipasuk ba rintai Projek Transformasyen Menua Pesisir (RTP) Sitak Kunsil Nengeri (DUN) Saribas ungkup taun 2024.
“Raban sekula (SK Balingan) udah mantaika peminta pasal ngemanahka jalai semin dalam sekula enggau mega ngemanah diwan ke udah kelalu repuk.
“Nyadi aku udah madah ngagai Kepala Pengajar (SK Balingan) peminta sida nya udah dipasuk dalam rintai projek RTP kitai (DUN Saribas),” ku iya.
Razi ke mega Kaban Kunsil Nengeri (ADUN) Saribas madah munyi nya lebuh nanguhka Pekit Lumba Ninting Taun Sekula diatur Gerempung Apai Indai Nembiak enggau Pengajar (PIBG) Sekula Primari (SK) Balingan ditu, kemari.
Udah nya, Razi ke mega Sapit Menteri Pemansang Indu, Anak Mit enggau Pengelantang Komuniti Sarawak ngarap atur lebih ditendur bekaul enggau pengawa nguna agih belanja ari perintah nengeri dikena ngemansangka premis dipenggi perintah besai.
Ku iya, niat pengari rayat iya nya deka mantu mantu sekula ba sitak ke dijaga diri empu.
“Kitai endang bisi juluk deka mantu sekula laban tu endang sitak (dijaga) aku nyadi aku ngembuan pangku pengawa mantu sekula-sekula tu.
“Semina aku ngarapka atur lebih tendur dikena bejalaika projek-projek ti nguna agih belanja perintah nengeri ungkup ngemansangka premis-premis diempu Perintah Besai ngarap pekara tu udah dikemujur enggau teputar,” ku iya.
Sama bisi datai nyempulang pejalai Razi ngelawa SK Balingan iya nya Sapit Tuai Pegawai Opis Pelajar Pelilih (PPD) Betong (sektor perambu) Junaidi Salleh, bala tuai raban bansa besemak enggau apai indai nembiak.
SK Balingan diatu bisi 68 iku nembiak sereta dirintai siti ari sekula repuk di nengeri tu.-TVS
