BETONG, 6 Okt: Pengawa lumba ninting taun ke diatur ba sesebengkah sekula ulih nyadi siti pelasar ke pemadu nemban dikena narak purih mensia ti menyana.
Sapit Menteri Pengelantang Indu, Anak Mit enggau Komuniti (KPWKK) Sarawak Mohd Razi Sitam madah, nengah aktiviti lumba nya mega nyadi siti pelasar endur bala pengajar enggau apai indai nembiak ngerapat ke agi kaul enggau pangan diri.
“Tadi kitai sempat meda sekeda lumba bisi dipasuk bala apai indai tauka PIBG ditu empu.
“Nya alai, pengawa ngatur lumba ba sekula ke mega bisi dipasuk raban nembiak tu endang amat manah laban ulih nyadi pelasar nemban dikena narah purih mensia menyana,” ku iya.
Razi ke mega Kaban Kunsil Nengeri (ADUN) Saribas madah munyi nya lebuh nanguhka Pekit Lumba Ninting Taun Sekula diatur Gerempung Apai Indai Nembiak enggau Pengajar (PIBG) Sekula Primari (SK) Balingan ditu, kemari.
Nangkan ke nya, ku Razi entara tuju besai pekit lumba nya diatur ba sekula iya nya dikena meda pengulih siku-siku nembiak ba lumba kelimpah endur milih atlit ti ulih ngari ke sekula ngagai renggat pelilih, nengeri tauka nasional.
“Aku ngarapka pengawa lumba baka tu ulih nyadi siti pelasar ngagai bala nembiak dikena sida ngangkat ke pengulih diri.
“Antara tuju besai pengawa lumba tu diatur iya nya dikena meda pengulih siku-siku nembiak ba bidang lumba kelimpah palan endur milih atlit bepenau ngari ke sekula, pelilih, nengeri tauka menua jemah,” ku iya.-TVS
