DEBAK, 5 Okt: Bepelasarka ripot polis penyampau kes bekaul enggau dadah ngaul raban nembiak sekula sekondari diatu chukup ngirauka ati.
Beduduk ari nya, Sapit Menteri Pengelantang Indu, Anak Mit enggau Komuniti (KPWKK) Sarawak Mohd Razi Sitam madah, kerejasama semua raban chukup beguna dalam nagang pengerembai kes salah nguna dadah lebih agi ngaul raban nembiak sekula di nengeri tu.
“Bepelasarka ripot polis mayuh kes bekaul enggau dadah diripotka nyadi ba raban nembiak sekula lebih agi nembiak sekula sekondari nyadi tu chukup ngirauka ati kitai laban nangika iya majak nyadi,” ku iya.
Razi ke mega Kaban Kunsil Nengeri (ADUN) Saribas, madah munyi nya maya bejadika Program Pendidikan Pencegahan Dadah (PPDA) diatur Sekula Sekondari (SMK) Saribas ba Diwan Sri Rimbas pagi tadi.
Nangkan ke nya, iya maransang peranak Saribas enda tau enda chakah bekerejasama enggau ejensi bekaul dikena mutarka isu dadah tu.
“Tanggungpengawa mensia mayuh tauka komuniti mega sida patut ngatur program ti engkeman dikena mutar ke isu tu ba nengeri Sarawak baka bekerejasama enggau AADK, Kemas, PDRM sereta ke bukai,” ku iya.
Ungkup penerang, program ke diatur sehari nya digulu urung 200 iku nembiak ari tujuh bengkah sekula sekondari enggau sekula primari (SK) ke bisi ba zon Debak.-TVS
