KUCHING, 1 Okt: SME Corp Malaysia bisi nyendiaka geran khas dikena mantu Pedagang Mit Enggau Jelan Pemesai (PKS) di Sabah enggau Sarawak.
Tua Pegawai Eksekutif iya, Rizal Nainy madah, pengawa ejensi nya mantu PKS di wilayah Borneo berupai dipeda nengah Program Bumiputera Enterprise Enhancement BEEP.
“Program B-Plus iya nya program geran ke diberi khas ngagai pedagang mikro ba Sabah enggau Sarawak,” ku iya.
Lebuh nerang silik, Rizal madah, bisi mega inisiatif khas baka Geran Dagang Mikro sereta Mikro Business Financing ungkup jali mudah.
“SME Corp Msia udah nempa sekeda program tauka inisiatif khas baka Geran Dagang Mikro, pia mega enggau Mikro Business Financing ungkup jali mudah enggau kitai mega bisi program baka Program Belia Mikro @TUBE Tunas Usahawan Belia Bumiputera.
Nya alai, ku Rizal SME Corp mega bisi nyendiaka baucher RM100 ngagai pedagang mikro ke berejister enggau raban sida.
Nengah pemisi program tauka inisiatif baka tu ku iya, nya deka ngemuntangka pedagang mikro ngurangka ungkus dagang sida.
Kelimpah ari nya, ku iya nya mega mantu ngurangka pemar bukai baka pejalai duit ke lubah sereta ngerembaika makit produk sida.
Ngelansa pasal program ‘Pengukuhan Mikro Madani’ dia Rizal madah program nya udah meri pemaik ngagai lebih 20,000 iku pedagang.
“Tu ulih nyema matak mayuh agi pedagang mikro dalam ngerembaika agi dagang produk sida.
“Enti enda sempat datai tau peda laman web kami ba sme.gov.my/mikromadani,” ku terang iya.
Program Pengukuhan Mikro Madani ti dipenyadi kena 20 September tu tadi udah nerima agih belanja RM100 juta ari Opis Menteri Pemansang Pedagang enggau Gerempung Kerejasama. -TVS
