SARATOK, 30 Sept: Kaban Kunsil Nengeri (ADUN) Saribas Mohd Razi Sitam madah Projek Sapat Bah Debak ke beungkus RM30 juta diatu benung bejalai enggau lanchar.
Ku iya, sebedau tu Projek Sapat Bah Debak bisi tejanggal ketegal pengerekai Covid-19 sereta isu orang ke ngempu tanah, taja pia diatu semua penanggul nya udah teputar.
“Asil ari saup sida Opis Tanah enggau Survei sereta Opis Parit enggau Entali Ai diatu projek nya benung bejalai enggau lanchar.
“Nyadi aku ngarapka penembu projek nya ila ulih mutarka penanggul bah besai,” ku iya.
Razi mansutka pekara nya ngagai raban media pengudah bejadika Program Ngintu Hari Malaysia Tikas Pelilih Saratok 2023 diatur Gerempung Veteran Raban Soldadu Malaysia (PVATM) begulai enggau Palan Servis DUN Kalaka enggau Opis Pelilih Saratok ba Panggau Besai Sri Kalaka ditu, pagi tadi.
Berebak enggau nya, Razi bisi ngelalau mensia mayuh lebih agi ba Debak anang enda ngadang beduduk ari pangka Monsun Timur Laut (Musin Landas).
“Diatu udah deka masuk bulan Oktober nyadi aku pechaya mensia mayuh mega udah meretika gaya ubah mua hari lebih agi Monsun Timur Laut.
“Pekara ke dirunding kitai tentu iya penusah ampuh bah tauka bah tunggal nyadi aku ngarapka mensia mayuh legih agi ba Saribas ke diau ngerimbai sungai anang enda ngadang,” ku iya.
Sama bisi datai ba program nya Kaban Kunsil Nengeri (ADUN) Krian Friday Belik, ADUN Kalaka Mohd Duri, Pegawai Pelilih (DO) Saratok Haron Mahidi enggau ke bukai.-TVS
