KOTA SENTOSA, 30 Sept: Berekat sukung sereta pengeransing bala apai indai ti udah sanggup limpang nganjung bala anak belajarka main asal dia Kelas Main Asal Ajat Indu Iban Renggat 16 enggau Ajat Lelaki Iban Renggat 15 diatur akademi Serakup Dayak Iban Sarawak (ASADIA) bejalai enggau mujur ba Indu Opis SADIA di Kota Sentosa, Kuching.
Beduduk ari nya, Tuai ASADIA Mabong Unggang ngarapka bala indai lebih agi komuniti Dayak terus nyukung pengawa diatur ASADIA dalam negi enggau ngetanka main asal bansa Dayak di menua tu dudi hari awakka pengawa nya enda tenggelam ngapa enggau meruan bisi orang nampung.
Nya alai, maya hari kepenudi kelas ngajat nya Mabong meri terima kasih besai ngagai pengajar Henry Guya enggau pengajar Elsie Joannes sereta bala apa indai ke udah mandangka sukung ke chukup manah ngagai kelas main asal nya.
“Sehari tu hari ke pengabis iya ngajat tauka tamat, nyadi aku meri besai terima kasih ngagai seduai iya sereta mega raban apai indai laban udah ngelimpang diri nganjung anak sida iya kitu belajar ngajat.
“Enti nadai sida iya nganjung sigi enda ulih mih anak mit tu tadi kitu.
“Arapka apai indai bukai bela ransing ati ngetan ngetanka main asal kitai bansa, ukai semina ngajat tang main asal ke bukai baka begendang, betabuh, tau magang nya dipelajar.
“Ukai semina ba ASADIA tang tau mega ba endur bukai laban diatu chukup mayuh palan belajarka main asal diatur nembiak rebak baru (nengah NGO ke bekaul),” ku iya.
Mabong mansutka penerang nya maya dirandau TVS ba hari kepenudi Kelas Main Asal Ajat Indu enggau Lelaki Iban bepalan ba Indu Opis SADIA ditu kena 25 September tu tadi sereta nungkatka rambaika jaku ‘Main Asal Kitai Tanggungpengawa Kitai’.
Nangkan ke nya, siku indai nembiak ke bisi nganjung anak belajarka main asal ba ASADIA, Rosemary Langgi asal ari Saratok muji pengawa ASADIA betuaika Mabong Unggang laban ti udah bebendar ngatur kelas nya.
“Aku tu meransang bansa kitai lebih agi bala apai indai awakka anang enggai nganjung bala anak tauka rebak baru belajar awakka sida nemu adat asal diri lebih agi bansa kitai Iban.
“Aku meri besai terima kasih ngagai pengajar Mabong Unggang ti udah muka Kelas Main Asal tu enggau semua raban ASADIA tu udah besukung ngemujurka Kelas Main Asal sepanjai dua bulan tu,” ku iya.
Udah nya, ngarika urung 30 iku nembiak ke bisi ngambi bagi ba kelas ngajat nya, Felecia Fivisher Sebi anak Joseph Kumbong ke benung belajar ba Universiti Malaysia Sarawak (Unimas) madah diri rindu belajar ngajat laban deka ngetan enggau ngerembaika main asal Iban ngambika enda lenyau ngapa.
“Aku deka belajar ngajat laban aku ngira kitai rebak baru patut ngetan sereta ngerembaika main asal kitai bansa.
“Enti enda (dipelajar) dia identiti bansa kitai deka lenyau. Terima kasih ngagai ASADIA… laban udah meri peluang ngagai rebak baru belajarka main asal kitai Iban,” ku iya.
Kelimpah ari Ajat Iban, main asal bukai ke bela bisi diajar ba palan ASADIA baka ajat Datun Julud (Orang Ulu), Betabuh, Gendang Pampat, Birejang Beuh (Bidayuh) ungkup indu enggau lelaki, Belikan, Sape enggau Kuntau.
Semua kelas main asal tu diatur ninting hari berengkah pukul 7.30 malam ngagai pukul 9.00 malam ba Ringkat 2 enggau Ringkat 3, Indu Opis SADIA empu.
Ungkup penerang, pengawa beserumpu ngerami tamat semua Kelas Main Asal ASADIA 2023 deka diatur kena 2 Disember bepalan ba Balai Raya Gerempung Bansa Dayak Bidayuh (DBNA), Jalai Ong Tiang Swee, Kuching.
Temuai dipebasa dikangau bejadika pengerami tu ila iya nya Sapit Premier Sarawak Datuk Amar Douglas Uggah Embas.-TVS
