KUCHING, 29 Sept: Beserimbai enggau taun ketiga pengada TVS kena 9 Oktober tu, dia nama baru Berita Iban deka diubah nyadi Berita Iban TVS sereta agi mengkang dipancharka kena pukul 11.00 pagi enggau 7.00 malam ninting hari.
Bepelasarka penerang ke dibantai TVS sehari tu mega madahka buletin berita TVS deka mantaika tiga segmen buletin berita baru iya nya Berita TVS dalam Jaku Melayu dikena nukar nama Ringkas TVS berengkah 9 Oktober tu.
Genap segmen buletin nya deka dipancharka pengelama 30 minit kena pukul 7.00 pagi, 12.00 tengah hari enggau 4.55 lemai.
Mua ke pagi, Berita TVS@7 deka mantaika berita padat mungkur berita lokal, nasional sereta antarabangsa lalu tu dikena nentuka mensia mayuh bela nemu penyadi berita dunya, serantau, enggau domestik kelimpah penonton terus nemu pekara ke nyadi ba serata dunya nengah televisyen.
Udah nya, ungkup tengah hari, Berita TVS@12 mungkur berita pemadu baru, digempuru enggau silik nengah rentayan ke besai ngaul pemberita tebalan kami ba luar opis sereta nengah pelasar media rama ke dinamik, bekau ari nya nentuka penonton TVS nerima penerang ke pemadu padat sereta senutuk enggau jam.
Nangkan ke nya Berita TVS@4:55 iya nya segmen buletin lemai ti deka meri perati berat ngagai pengawa mantaika berita pemadu baru ngaul serantau ti padat, silik ngambika penonton seruran nemu berita pemadu baru nyadi dalam komuniti lokal diri.
Berebak enggau nya, segmen berita tu deka mantaika berita dagang nengah bemacham cherita ba renggat nasional enggau lokal sereta meri berita padat pasal berita sepanjai hari.
Udah nya, Re Bao TVS pukul 1.00 ngalih hari enggau 6.00 lemai sereta Nighline TVS agi baka selama.
Teruska meda TVS ba channel 122 MYTV enggau Astro sereta ba Unifi TV ti deka dipancharka kena 1 Oktober tu. – TVS
