ROBAN, 28 Sept: Serikat besai di menua tu dikearapka terus chakah bejalaika Progam Tanggungpengawa Rama Korporat (CSR) mantu sekula lebih agi ba kandang menua pesisir.
Tuai Pegawai Opis Pelajar Pelilih (PPD) Saratok, Anis Madeli madah, Program Jangkauan Luar MLNG Bestari ke dikemujur raban Petronas di Sekula Primari (SK) Ulu Roban patut nyadi chunto ngagai serikat besai ke bukai.
“Aku meri besa terima kasih ngagai raban MLNG Petronas laban tu mih keterubah iya program baka tu dipejalaika ba sekula di pelilih Saratok.
“Pengawa baka tu endang sigi patut dipejalaika serikat besai baka Petronas enggau serikat besai ke bukai dikena mantu ngangkatka agi bidang pelajar di nengeri tu,” ku iya.
Anis madah munyi nya rambau Program Jangkauan Luar MLNG Bestari di SK Ulu Roban, ditu kena Hari Dua tu tadi.
Berebak enggau nya, ku Anis Program CSR baka nya chukup senutuk enggau juluk Opis Menteri Pelajar Malaysia (KPM) ti deka ngangkat manah institusyen pelajar di menua tu.
“Siti pengawa ke manah ari Petronas lalu ngarap ke pengawa baka tu ulih diteruska dudi hari.
“Kami raban PPD Saratok berasai temegah lalu tu mega siti ari chara kitai ulih begempung besukung enggau pangan diri ngangkat ke institusyen pelajar menua kitai,” ku iya.
Ungkup penerang, dua buah sekula ba Pelilih Mit Roban ke sama ngasaika pemaik ari projek tu iya nya Sekula Sekondari (SMK Kalaka enggau SK Sungai Nyiar.
Antara bantu ke dikemujur petronas nengah program CSR tu baka Projek Ngemanahka Kuaters Pengajar, Ngemanahka Buding Nembiak, Ngemanahka Diwan Makai enggau Bilik Isolasyen nyengkaum meri 300 iti kerusi enggau 13 iti kipas dinding.
Udah nya, Ngemanahka Kelas Pra-Sekula enggau Bilik Kelas Primari 1 nyentuk Primari 6 nyengkaum meri 16 iti lokker, 61 iti kerusi enggau mija, 6 iti TV pintar, 6 iti laptop enggau 3 iti modem Jalur Lebar.
Nangkan ke nya, Petronas mega bisi meri kereban dikena belajar enggau ngajar (PDP), Ngemanah Bilik Pemulihan, Bilik SPBT, Bilik Pelajar Islam enggau Bilik Sains.
Petronas mega mantu ngemanahka Librari enggau Bilik ICT nyengkaum meri kereban baka siti TV Pintar, 15 iti destop komputer enggau siti modem Jalur Lebar.
Bantu bukai baka ngaga tangga simen nyengkaum masang perabung enggau ngaga palan entepan kerita, ngaga agu sekula, agu buding nembiak enggau bilik mandi nembiak sereta ngaga astaka, pelaman gempuru, langkau papan notis enggau ngemanah bilik kereban lumba sekula.-TVS
