ROBAN, 28 Sept: Raban nembiak sekula di menua tu enda tau enda mupuk nyikap diri dikena nangkup peluang gawa ke bisi disediaka perintah nengeri nengah Strategi Pemansang Pasca Covid-19 (PCDS 2030).
Kaban Kunsil Nengeri (ADUN) Kalaka Mohd Duri madah, tu berindik ari PCDS 2030 ngundan program pemansang ti begunaka urung 15, 000 iku orang gawa ngaul bemacham bidang pengelandik.
“Nengah langgur PCDS 2030 Premier Sarawak Datuk Patinggi Tan Sri Abang Johari Tun Openg ngemeratka mayuh sektor ekonomi deka dikemansang lebih agi dalam SSUS baka dipeda kitai ba luar tadi nangkap karbon.
“Pia mega, ba PCDS ila perintah beguna ke abis nadai 15, 000 pengereja pengawa.
“Nyadi anang (nembiak sekula) enggai belajar bebendar ngambi bidang injiniring, luyar, akauntan enggau ke bukai laban peluang gawa tetap bisi nganti,” ku iya.
Mohd Duri madah munyi nya lebuh bejaku rambau bejadi Program Jangkauan Luar MLNG Bestari ba Diwan Sri Tebujang Sekula Sekondari (SMK) Kalaka, ditu kemari.
Lebuh ngelansa pasal Program Tanggung Pengawa Rama (CSR) Malaysia LNG ba SMK Kalaka, Mohd Duri madah, program baka nya endang sigi patut laban nya siti chara ti manah dikena mantu sekula menua pesisir di Sarawak.
“Ari pemisi kerejasama rat enggau serikat besai baka MLNG ke ulih meri bantu ngagai sekula ba selampur Sarawak enggau Malaysia ngujung ke kitai ulih ngada ke nembiak ti mereti sereta ulih besemekih,” ku iya.
Ungkup penerang, siti agi sekula ke sama bisi nerima projek baruh Program Jangkauan Luar MLNG Bestari tu iya nya SK Sungai Nyiar.
Sama bisidatai, Tuai Pegawai Ekskutif Gerup Serikat Malaysia LNG Mohamed Syazwan enggau ke bukai.-TVS
